ਟੋਰਾਂਟੋ, 28 ਜੂਨ (ਪੋਸਟ ਬਿਊਰੋ) : ਐਂਡਰੀਆ ਹੌਰਵਥ ਵੱਲੋਂ ਚਾਰ ਹਫਤੇ ਪਹਿਲਾਂ ਇਹ ਐਲਾਨ ਕੀਤਾ ਗਿਆ ਸੀ ਕਿ ਉਹ ਓਨਟਾਰੀਓ ਦੀ ਐਨਡੀਪੀ ਆਗੂ ਵਜੋਂ ਅਹੁਦਾ ਛੱਡ ਦੇਵੇਗੀ, ਇਸ ਦੇ ਚੱਲਦਿਆਂ ਟੋਰਾਂਟੋ ਤੋਂ ਸੀਨੀਅਰ ਐਮਪੀਪੀ ਪੀਟਰ ਟੈਬੰਸ ਨੂੰ ਰਸਮੀ ਤੌਰ ਉੱਤੇ ਪਾਰਟੀ ਦਾ ਅੰਤਰਿਮ ਆਗੂ ਐਲਾਨਿਆ ਗਿਆ ਹੈ।
ਮੰਗਲਵਾਰ ਸ਼ਾਮ ਨੂੰ ਕੀਤੀ ਗਈ ਟਵੀਟ ਉੱਤੇ ਟੈਬੰਸ ਨੇ ਆਖਿਆ ਕਿ ਅੰਤਰਿਮ ਆਗੂ ਚੁਣੇ ਜਾਣ ਲਈ ਉਹ ਓਨਟਾਰੀਓ ਐਨਡੀਪੀ ਦੇ ਸਾਰੇ ਮੈਂਬਰਾਂ ਦੇ ਸ਼ੁਕਰਗੁਜ਼ਾਰ ਹਨ।ਉਨ੍ਹਾਂ ਆਖਿਆ ਕਿ ਸਾਰੇ ਮੈਂਬਰਾਂ ਵੱਲੋਂ ਉਨ੍ਹਾਂ ਉੱਤੇ ਜਿਹੜਾ ਵਿਸ਼ਵਾਸ ਪ੍ਰਗਟਾਇਆ ਗਿਆ ਹੈ ਉਸ ਦਾ ਉਹ ਪੂਰਾ ਮਾਣ ਰੱਖਣਗੇ। ਉਨ੍ਹਾਂ ਇਹ ਵੀ ਆਖਿਆ ਕਿ ਉਹ ਪ੍ਰੋਵਿੰਸ ਦੇ ਮੈਂਬਰਾਂ ਲਈ ਵੀ ਲੜਨਗੇ।
2006 ਵਿੱਚ ਟੋਰਾਂਟੋ-ਡੈਨਫੋਰਥ ਵਿੱਚ ਹੋਈਆਂ ਜਿ਼ਮਨੀ ਚੋਣਾਂ ਵਿੱਚ ਟੈਬੰਸ ਪਹਿਲੀ ਵਾਰੀ ਚੁਣੇ ਜਾਣ ਤੋਂ ਬਾਅਦ ਓਨਟਾਰੀਓ ਵਿਧਾਨਸਭਾ ਵਿੱਚ ਪਹੁੰਚੇ। ਉਨ੍ਹਾਂ ਵੱਲੋਂ ਕਈ ਕ੍ਰਿਟਿਕਸ ਦੀ ਭੂਮਿਕਾ ਨਿਭਾਈ ਜਾ ਚੁੱਕੀ ਹੈ।ਪਿਛਲੇ ਕੁੱਝ ਸਾਲਾਂ ਤੋਂ ਉਹ ਐਨਰਜੀ ਤੇ ਐਨਵਾਇਰਮੈਂਟ ਉੱਤੇ ਧਿਆਨ ਕੇਂਦਰਿਤ ਕਰ ਰਹੇ ਹਨ। ਜਿ਼ਕਰਯੋਗ ਹੈ ਕਿ 2009 ਤੋਂ ਓਨਟਾਰੀਓ ਐਨਡੀਪੀ ਆਗੂ ਵਜੋਂ ਸੇਵਾ ਨਿਭਾਅ ਰਹੀ ਹੌਰਵਥ ਨੇ 2 ਜੂਨ ਨੂੰ ਹੋਈਆਂ ਪ੍ਰੋਵਿੰਸ਼ੀਅਲ ਚੋਣਾਂ ਤੋਂ ਬਾਅਦ ਇਹ ਐਲਾਨ ਕੀਤਾ ਸੀ ਕਿ ਉਹ ਆਪਣਾ ਅਹੁਦਾ ਛੱਡ ਦੇਵੇਗੀ।