ਓਨਟਾਰੀਓ, 27 ਜੂਨ (ਪੋਸਟ ਬਿਊਰੋ) :ਇੱਕ ਸਕੂਲ ਦੇ ਬਾਹਰ ਗਰਮ ਕਾਰ ਵਿੱਚ ਬੰਦ ਰਹਿ ਜਾਣ ਕਾਰਨ ਇੱਕ 23 ਮਹੀਨਿਆਂ ਦੇ ਬੱਚੇ ਦੀ ਮੌਤ ਹੋ ਗਈ। ਕਾਰ ਉਸ ਸਕੂਲ ਦੇ ਬਾਹਰ ਹੀ ਖੜ੍ਹੀ ਸੀ ਜਿੱਥੇ ਬੱਚੇ ਦੀ ਮਾਂ ਪੜ੍ਹਾਉਂਦੀ ਸੀ। ਇਹ ਜਾਣਕਾਰੀ ਮੇਅਰ ਨੇ ਦਿੱਤੀ।
ਬੈਂਕ੍ਰੌਫਟ, ਓਨਟਾਰੀਓ ਦੇ ਮੇਅਰ ਪਾਲ ਜੈਨਕਿੰਜ਼, ਜੋ ਇਸ ਪਰਿਵਾਰ ਦੇ ਨੇੜਲੇ ਦੋਸਤ ਹਨ ਤੇ ਇਸ ਪਰਿਵਾਰ ਨੂੰ ਪਿਛਲੇ 30 ਸਾਲਾਂ ਤੋਂ ਜਾਣਦੇ ਹਨ, ਨੇ ਦੱਸਿਆ ਕਿ ਵੀਰਵਾਰ ਨੂੰ ਅਧਿਆਪਕਾਂ ਤੇ ਐਮਰਜੰਸੀ ਅਮਲੇ ਵੱਲੋਂ ਨੌਰਥ ਹੇਸਟਿੰਗਜ਼ ਹਾਈ ਸਕੂਲ ਦੇ ਬਾਹਰ ਇਸ ਬੱਚੇ ਨੂੰ ਹੋਸ਼ ਵਿੱਚ ਲਿਆਉਣ ਲਈ ਪੂਰਾ ਜ਼ੋਰ ਲਾਏ ਜਾਣ ਦੇ ਬਾਵਜੂਦ ਐਵਰੈੱਟ ਸਮਿੱਥ ਦੀ ਮੌਤ ਹੋ ਗਈ।ਜੈਨਕਿੰਜ਼ ਨੇ ਦੱਸਿਆ ਕਿ ਐਵਰੈੱਟ ਦੀ ਮਾਂ ਇਸ ਸਕੂਲ ਵਿੱਚ ਅਧਿਆਪਿਕਾ ਹੈ।ਮੇਅਰ ਅਨੁਸਾਰ ਬੱਚੇ ਦੀ ਮਾਂ ਨੇ ਕੰਮ ਉੱਤੇ ਜਾਂਦੇ ਸਮੇਂ ਆਪਣੇ ਲੜਕੇ ਨੂੰ ਡੇਅਕੇਅਰ ਵਿੱਚ ਛੱਡਣਾ ਸੀ।
ਜੈਨਕਿੰਜ਼ ਨੇ ਦੱਸਿਆ ਕਿ ਇਸ ਗੱਲ ਦਾ ਕਿਸੇ ਨੂੰ ਵੀ ਧਿਆਨ ਨਹੀਂ ਆਇਆ ਕਿ ਸਕੂਲ ਖ਼ਤਮ ਹੋਣ ਤੱਕ ਐਵਰੈੱਟ ਗੱਡੀ ਵਿੱਚ ਹੀ ਸੀ। ਉਸ ਦਿਨ ਦੱਖਣੀ ਓਨਟਾਰੀਓ ਵਿੱਚ ਹੀਟ ਵਾਰਨਿੰਗ ਜਾਰੀ ਕੀਤੀ ਗਈ ਸੀ ਤੇ ਤਾਪਮਾਨ 30 ਡਿਗਰੀ ਤੱਕ ਪਹੁੰਚ ਗਿਆ ਸੀ। ਉਸ ਦਿਨ ਬੈਂਕ੍ਰੌਫਟ ਦਾ ਤਾਪਮਾਨ 27·1 ਡਿਗਰੀ ਰਿਕਾਰਡ ਕੀਤਾ ਗਿਆ। ਗੱਡੀ ਵਿੱਚ ਬਿਨਾਂ ਸਾਹ ਸਤ ਦੇ ਬੱਚੇ ਦੇ ਮਿਲਣ ਉਪਰੰਤ ਦੁਪਹਿਰੇ 3:45 ਉੱਤੇ ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਨੂੰ ਸੱਦਿਆ ਗਿਆ। ਪੁਲਿਸ ਨੇ ਦੱਸਿਆ ਕਿ ਬੱਚੇ ਨੂੰ ਐਂਬੂਲੈਂਸ ਰਾਹੀਂ ਹਸਪਤਾਲ ਲਿਜਾਇਆ ਗਿਆ ਪਰ ਉਸ ਨੂੰ ਥੋੜ੍ਹੀ ਦੇਰ ਬਾਅਦ ਹੀ ਮ੍ਰਿਤਕ ਐਲਾਨ ਦਿੱਤਾ ਗਿਆ।