ਰੋਹਤਕ, 26 ਜੂਨ (ਪੋਸਟ ਬਿਊਰੋ)- ਪੰਜਾਬ ਦੇ ਗਾਇਕ ਸਿੱਧੂ ਮੂਸੇਵਾਲਾ ਦੇ ਕਤਲ ਦੇ ਕਈ ਦਿਨ ਪਿੱਛੋਂ ਰਿਲੀਜ਼ ਹੋਏ ਗੀਤ ਨੇ ਜਿੱਥੇ ਸਤਲੁਜ-ਜਮਨਾ ਲਿੰਕ (ਐਸ ਵਾਈ ਐਲ) ਨਹਿਰ ਦੇ ਰੇੜਕੇ ਨੂੰ ਤਾਜ਼ਾ ਕਰ ਦਿੱਤਾ ਹੈ, ਉਥੇ ਹੀ ਆਪਸੀ ਭਾਈਚਾਰੇ ਅਤੇ ਰਾਸ਼ਟਰਵਾਦ ਦੀ ਭਾਵਨਾ ਨੂੰ ਵੀ ਠੇਸ ਲਾਉਣ ਦੀਆਂ ਗੱਲਾਂ ਵੀ ਚੱਲ ਪਈਆਂ ਹਨ।
ਮੂਸੇਵਾਲਾ ਦੇ ਇਸ ਗੀਤ ਦਾ ਜਵਾਬ ਦੇਣ ਲਈ ਹਰਿਆਣੇ ਦੇ ਗਾਇਕ ਮੈਦਾਨ ਵਿੱਚ ਉਤਰ ਪਏ ਹਨ। ਉਨ੍ਹਾਂ ਨੇ ਆਪੋ-ਆਪਣੇ ਤਰੀਕੇ ਨਾਲ ਗੀਤ ਰਿਲੀਜ਼ ਕਰ ਕੇ ਇਸ ਦਾ ਜਵਾਬ ਦਿੱਤਾ ਹੈ। ਰਾਮਕੇਸ਼ ਜੀਵਨਪੁਰੀਆ ਨੇ ਐਸ ਵਾਈ ਐਲ ਦੇ ਪਾਣੀ ਉੱਤੇ ਹਰਿਆਣਾ ਦਾ ਹੱਕ ਅਤੇ ਹਰਿਆਣਾ-ਪੰਜਾਬ ਦੇ ਆਪਸੀ ਭਾਈਚਾਰੇ ਬਾਰੇ ਗੀਤ ਰਿਲੀਜ਼ ਕੀਤਾ ਹੈ, ਜਿਸ ਨੂੰ ਦੋ ਘੰਟੇ ਵਿੱਚ ਪੰਜਾਹ ਹਜ਼ਾਰ ਤੋਂ ਵੱਧ ਵਿਊਜ਼ ਮਿਲ ਗਏ। ਇਸੇ ਤਰ੍ਹਾਂ ਹਰਿਆਣਵੀ ਸਿੰਗਰ ਮਾਸੂਮ ਸ਼ਰਮਾ ਨੇ ਗੀਤ ਜ਼ਰੀਏ ਐਸ ਵਾਈ ਐਲ ਦੇ ਪਾਣੀ ਦੀ ਇੱਕ-ਇੱਕ ਬੂੰਦ ਲੈਣ ਦਾ ਦਾਅਵਾ ਕੀਤਾ ਹੈ। ਹਰਿਆਣਵੀ ਗਾਇਕ ਅਮਨ ਨੇ ਐਸ ਵਾਈ ਐਲ ਉੱਤੇ ਗਾਣਾ ਗਾਇਆ ਹੈ।ਹਰਿਆਣਵੀ ਸਿੰਗਰ ਅਤੇ ਮੁੱਖ ਮੰਤਰੀ ਮਨੋਹਰ ਲਾਲ ਦੇ ਇੱਕ ਓ ਐਸ ਡੀ (ਪਬਲੀਸਿਟੀ) ਗਜੇਂਦਰ ਫੌਗਟ ਨੇ ਮੂਸੇਵਾਲਾ ਦੇ ਵਿਵਾਦਤ ਗੀਤ ਦੇ ਜਵਾਬ ਵਿੱਚ ਗੀਤ ਬਣਾਉਣ ਦਾ ਦਾਅਵਾ ਕੀਤਾ ਸੀ, ਪਰਗੀਤ ਬਣਾਉਣ ਦੇ ਬਜਾਏ ਉਹ ਸ਼ੋਅ ਲਈ ਇੰਗਲੈਂਡ ਰਵਾਨਾ ਹੋ ਗਏ। ਗਜੇਂਦਰ ਫੌਗਾਟ ਤੋਂ ਪਹਿਲਾਂ ਰਾਮਕੇਸ਼ ਜੀਵਨਪੁਰੀਆ ਅਤੇ ਮਾਸੂਮ ਸ਼ਰਮਾ ਤੇ ਹੋਰਨਾਂ ਗਾਇਕਾਂ ਨੇ ਗੀਤ ਰਿਲੀਜ਼ ਕਰ ਦਿੱਤਾ ਹੈ।
ਰਾਮਕੇਸ਼ ਜੀਵਨਪੁਰੀਆ ਨੇ ਆਪਣੇ ਗੀਤ ‘ਪੰਜਾਬੀ ਸੂਬਾ ਮਾਂਗਾ, ਅਬ ਹਰਿਆਣਾ ਮਾਂਗੋ, ਕਿਓਂ ਬਾਤ ਘੁਮਾ ਕੇ ਪਾਣੀ ਪਰ ਝੰਡਾ ਟਾਂਗੋ, ਅਰੇ ਸੀਧੇ ਮੂੰਹ ਕਹਿ ਦੋ ਨਾ ਕਿ ਸਾਥ ਦੇਨਾ ਨਹੀਂ, ਹਮਾਰੇ ਹਰਿਆਣਾ ਕੇ ਹੱਕ ਦਾ ਮਾਰਨਾ ਅੱਛੀ ਬਾਤ ਨਹੀਂ...' ਕੱਲ੍ਹ ਸ਼ਾਮ ਰਿਲੀਜ਼ ਕੀਤਾ ਹੈ। ਉਨ੍ਹਾਂ ਨੇ ਇਸ ਗੀਤ ਨਾਲ ਦੱਸਿਆ ਕਿ ਪਹਿਲਾਂ ਪੰਜਾਬ ਤੋਂ ਹਰਿਆਣਾ ਨੂੰ ਅਲੱਗ ਕੀਤਾ ਅਤੇ ਅੱਜਕੱਲਬਣਦੇ ਹੱਕ ਦਾ ਐਸ ਵਾਈ ਐਲ ਦਾ ਪਾਣੀ ਵੀ ਨਹੀਂ ਦੇ ਰਿਹਾ।