ਓਨਟਾਰੀਓ, 23 ਜੂਨ (ਪੋਸਟ ਬਿਊਰੋ) : ਸਿਹਤ ਮੰਤਰੀ ਵਜੋਂ ਪ੍ਰੀਮੀਅਰ ਡੱਗ ਫੋਰਡ ਦਾ ਝੁਕਾਅ ਸਿਲਵੀਆ ਜੋਨਜ਼ ਵੱਲ ਨਜ਼ਰ ਆ ਰਿਹਾ ਹੈ। ਇਹ ਜਾਣਕਾਰੀ ਅੰਦਰੂਨੀ ਸੂਤਰਾਂ ਵੱਲੋਂ ਦਿੱਤੀ ਗਈ।
2007 ਤੋਂ ਐਮਪੀਪੀ ਜੋਨਜ਼ ਪਹਿਲਾਂ ਸਾਲੀਸਿਟਰ ਜਨਰਲ ਰਹਿ ਚੁੱਕੀ ਹੈ ਤੇ ਉਨ੍ਹਾਂ ਕੋਵਿਡ-19 ਦੌਰਾਨ ਸਰਕਾਰ ਵੱਲੋਂ ਨਿਭਾਈ ਭੂਮਿਕਾ ਵਿੱਚ ਅਹਿਮ ਯੋਗਦਾਨ ਪਾਇਆ।ਕ੍ਰਿਸਟੀਨ ਐਲੀਅਟ ਦੇ 2 ਜੂਨ ਨੂੰ ਹੋਈਆਂ ਚੋਣਾਂ ਵਿੱਚ ਖੜ੍ਹੇ ਨਾ ਹੋਣ ਦਾ ਫੈਸਲਾ ਕਰਨ ਕਾਰਨ ਇਹ ਅਹੁਦਾ ਖਾਲੀ ਹੋ ਗਿਆ ਹੈ। ਅਹਿਮ ਅਹੁਦਾ ਹੋਣ ਕਾਰਨ ਇਸ ਨੂੰ ਭਰਨ ਲਈ ਕੋਈ ਦਮਦਾਰ ਸ਼ਖਸੀਅਤ ਚਾਹੀਦੀ ਹੈ ਤੇ ਇਸ ਲਈ ਜੋਨਜ਼ ਦੇ ਨਾਂ ਉੱਤੇ ਸਰਕਾਰ ਵੱਲੋਂ ਵਿਚਾਰ ਕੀਤਾ ਜਾ ਰਿਹਾ ਹੈ।
ਕਈ ਸੂਤਰਾਂ ਤੋਂ ਇਹ ਵੀ ਪਤਾ ਲੱਗਿਆ ਹੈ ਕਿ ਨਵੇਂ ਚੁਣੇ ਗਏ ਐਮਪੀਪੀ ਮਾਈਕਲ ਫੋਰਡ, ਜੋ ਕਿ ਪ੍ਰੀਮੀਅਰ ਦਾ ਭਤੀਜਾ ਹੈ, ਨੂੰ ਵੀ ਕੈਬਨਿਟ ਵਿੱਚ ਕੋਈ ਪੋਸਟ ਦਿੱਤੀ ਜਾਵੇਗੀ। ਇਸ ਦੇ ਨਾਲ ਹੀ ਨਵੇਂ ਚੁਣੇ ਗਏ ਪੀਸੀ ਐਮਪੀਪੀ ਜਾਰਜ ਪਿਰੀ (ਟਿਮਿੰਜ਼) ਨੂੰ ਵੀ ਕੈਬਨਿਟ ਵਿੱਚ ਸ਼ਾਮਲ ਕੀਤਾ ਜਾ ਸਕਦਾ ਹੈ।ਹਾਲਾਂਕਿ ਫੋਰਡ ਨੇ ਮੰਗਲਵਾਰ ਨੂੰ ਇਸ ਗੱਲ ਤੋਂ ਇਨਕਾਰ ਕੀਤਾ ਸੀ ਕਿ ਉਹ ਸਿਹਤ ਪੋਰਟਫਲੀਓ ਨੂੰ ਵੰਡਣਗੇ ਪਰ ਕੁੱਝ ਹੋਰਨਾਂ ਮੰਤਰਾਲਿਆਂ ਵਿੱਚ ਤਬਦੀਲੀਆਂ ਜ਼ਰੂਰ ਹੋ ਸਕਦੀਆਂ ਹਨ। ਸੂਤਰਾਂ ਅਨੁਸਾਰ ਮਨਿਸਟਰੀ ਆਫ ਕਾਲੇਜਿਜ਼ ਨੂੰ ਲੇਬਰ ਮੰਤਰਾਲੇ ਤਹਿਤ ਲਿਆਂਦਾ ਜਾ ਸਕਦਾ ਹੈ ਤੇ ਜਿੱਥੇ ਮੌਂਟੀ ਮੈਕਨੌਟਨ ਦੇ ਮੰਤਰੀ ਬਣੇ ਰਹਿਣ ਦੀ ਸੰਭਾਵਨਾ ਹੈ। ਇਹ ਵੀ ਮੰਨਿਆ ਜਾ ਰਿਹਾ ਹੈ ਕਿ ਮਾਈਨਿੰਗ ਨੂੰ ਵੱਖਰਾ ਮੰਤਰਾਲਾ ਬਣਾਇਆ ਜਾ ਸਕਦਾ ਹੈ।
ਇਹ ਵੀ ਕਿਆਫੇ ਹਨ ਕਿ ਸਟੀਫਨ ਲਿਚੇ ਮੁੜ ਸਿੱਖਿਆ ਮੰਤਰੀ ਵਜੋਂ ਪਰਤਣਗੇ ਜਦਕਿ ਪੀਟਰ ਬੈਥਲੇਨਫੈਲਵੀ ਵਿੱਤ ਮੰਤਰੀ ਬਣੇ ਰਹਿਣਗੇ। ਲੀਸਾ ਮੈਕਲਿਓਡ ਦੇ ਕੈਬਨਿਟ ਵਿੱਚ ਪਰਤਣ ਦੀ ਕੋਈ ਉਮੀਦ ਨਹੀਂ ਹੈ।ਪ੍ਰੀਮੀਅਰ ਫੋਰਡ ਸ਼ੁੱਕਰਵਾਰ ਨੂੰ ਸਵੇਰੇ 11:15 ਵਜੇ ਕੁਈਨਜ਼ ਪਾਰਕ ਵਿਖੇ ਇੱਕ ਸਮਾਰੋਹ ਵਿੱਚ ਆਪਣੇ ਅਹੁਦੇ ਦੀ ਸੰਹੁ ਚੁੱਕਣਗੇ।