ਜਲੰਧਰ, 22 ਜੂਨ (ਪੋਸਟ ਬਿਊਰੋ)- ਕੱਲ੍ਹ ਸਵੇਰੇ ਸਥਾਨਕ ਸੋਢਲ ਰੇਲਵੇ ਫਾਟਕ ਤੋਂ ਥੋੜੀ ਦੂਰ ਇੱਕ ਕਰੀਬ 50 ਸਾਲਾ ਵਿਅਕਤੀ ਨੇ ਰੇਲ ਇੰਜਣ ਦੇ ਅੱਗੇ ਛਾਲ ਮਾਰ ਕੇ ਖੁਦਕੁਸ਼ੀ ਕਰ ਲਈ। ਲੋਕਾਂ ਮੁਤਾਬਕ ਉਕਤ ਵਿਅਕਤੀ ਰੇਲ ਲਾਈਨਾਂ ਦੇ ਕਿਨਾਰੇ ਆਪਣੀ ਐਕਟਿਵਾ ਖੜ੍ਹੀ ਕਰਕੇ ਇਧਰ-ਉਧਰ ਘੁੰਮ ਰਿਹਾ ਸੀ। ਅੰਮ੍ਰਿਤਸਰ ਤੋਂ ਆਏ ਇੰਜਣ ਦੇ ਆਉਂਦੇ ਹੀ ਉਸ ਨੇ ਛਾਲ ਮਾਰ ਕੇ ਖੁਦਕੁਸ਼ੀ ਕਰ ਲਈ।
ਮ੍ਰਿਤਕ ਦੀ ਪਛਾਣ ਅਮਿਤ ਡੋਗਰਾ (50) ਪੁੱਤਰ ਪ੍ਰਾਣਨਾਥ ਡੋਗਰਾ ਵਾਸੀ ਗਰੇਟਰ ਕੈਲਾਸ ਵਜੋਂ ਹੋਈ ਹੈ। ਉਹ ਤਿੰਨ ਭਰਾਵਾਂ ਵਿੱਚੋਂ ਸਭ ਤੋਂ ਛੋਟਾ ਸੀ। ਉਸ ਦੇ ਦੋ ਬੱਚੇ ਹਨ। ਜਾਂਚ ਅਧਿਕਾਰੀ ਦੇ ਮੁਤਾਬਕ ਤਿੰਨੇ ਭਰਾਂ ਅੰਨਪੂਰਣਾ ਨਾਮੀ ਹੋਟਲ ਚਲਾਉਂਦੇ ਸਨ, ਪਰ ਲਾਕਡਾਊਨ ਦੇ ਦੌਰਾਨ ਕੰਮ ਬੰਦ ਹੋਣ ਕਾਰਨ ਉਨ੍ਹਾਂ ਨੂੰ ਕਾਫੀ ਨੁਕਸਾਨ ਹੋਇਆ ਸੀ, ਜਿਸ ਕਾਰਨ ਅਮਿਤ ਮਾਨਸਿਕ ਪਰੇਸ਼ਾਨੀ ਵਿੱਚ ਸੀ।ਕੱਲ੍ਹ ਸਵੇਰੇ ਉਹ ਬਿਨ੍ਹਾਂ ਦੱਸੇ ਘਰੋਂ ਐਕਟਿਵਾ ਲੈ ਕੇ ਨਿਕਲਿਆ ਅਤੇ ਰੇਲ ਲਾਈਨਾਂ ਉੱਤੇ ਖ਼ੁਦਕੁਸ਼ੀ ਕਰ ਲਈ। ਪੁਲਸ ਦੇ ਮੁਤਾਬਕ ਮ੍ਰਿਤਕ ਕੋਲ ਮੋਬਾਈਲ ਫੋਨ ਸੀ ਜੋ ਹਾਦਸੇ ਦੌਰਾਨ ਟੁੱਟ ਗਿਆ। ਉਸਦੀ ਸਿਮ ਕੱਢ ਕੇ ਦੂਸਰੇ ਫ਼ੋਨ ਵਿੱਚ ਪਾ ਕੇ ਉਸ ਵਿੱਚ ਸੇਵ ਨੰਬਰ ਉੱਤੇ ਫੋਨ ਕਰਕੇ ਪਰਵਾਰ ਮੈਂਬਰਾਂ ਨੂੰ ਘਟਨਾ ਸਬੰਧੀ ਜਾਣਕਾਰੀ ਦਿੱਤੀ ਗਈ ਅਤੇ ਉਸ ਦੀ ਪਛਾਣ ਹੋ ਸਕੀ।