ਓਟਵਾ, 21 ਜੂਨ (ਪੋਸਟ ਬਿਊਰੋ) : ਦੇਸ਼ ਭਰ ਵਿੱਚ ਏਅਰਪੋਰਟਸ ਉੱਤੇ ਜਾਰੀ ਬੈਕਲਾਗਜ਼ ਦੀ ਸਮੱਸਿਆ ਨੂੰ ਹੱਲ ਕਰਨ ਦੇ ਇਰਾਦੇ ਨਾਲ ਇਸ ਹਫਤੇ ਫੈਡਰਲ ਟਰਾਂਸਪੋਰਟ ਮੰਤਰੀ ਏਅਰਪੋਰਟ ਅਧਿਕਾਰੀਆਂ ਤੇ ਏਅਰਲਾਈਨਜ਼ ਨਾਲ ਮੁਲਾਕਾਤ ਕਰਨਗੇ।
ਫਲਾਈਟ ਲੈਣ ਵਾਸਤੇ ਅਜੇ ਵੀ ਪੈਸੰਜਰਜ਼ ਨੂੰ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਓਮਰ ਅਲਘਬਰਾ ਨੇ ਆਖਿਆ ਕਿ ਉਹ ਚਾਰ ਸੱਭ ਤੋਂ ਵੱਡੇ ਏਅਰਪੋਰਟਸ ਦੇ ਨਾਲ ਨਾਲ ਵੈਸਟਜੈੱਟ ਤੇ ਏਅਰ ਕੈਨੇਡਾ ਦੇ ਅਧਿਕਾਰੀਆਂ ਨਾਲ ਵੀ ਮੁਲਾਕਾਤ ਕਰਨਗੇ ਤਾਂ ਕਿ ਇਸ ਮਸਲੇ ਨੂੰ ਹੱਲ ਕੀਤਾ ਜਾ ਸਕੇ। ਉਨ੍ਹਾਂ ਆਖਿਆ ਕਿ ਏਅਰਲਾਈਨਜ਼ ਨੂੰ ਵੀ ਆਪਣੀ ਜਿ਼ੰਮੇਵਾਰੀ ਸਹੀ ਢੰਗ ਨਾਲ ਨਿਭਾਉਣੀ ਚਾਹੀਦੀ ਹੈ। ਸਾਨੂੰ ਲੋਕਾਂ ਦੇ ਸਮਾਨ ਗੁੰਮਣ ਤੇ ਫਲਾਈਟ ਰੱਦ ਹੋਣ ਵਰਗੀਆਂ ਖਬਰਾਂ ਵੀ ਮਿਲ ਰਹੀਆਂ ਹਨ। ਅਸੀਂ ਇਹ ਯਕੀਨੀ ਬਣਾਉਣਾ ਚਾਹੁੰਦੇ ਹਾਂ ਕਿ ਏਅਰਲਾਈਨਜ਼ ਵੀ ਆਪਣੀ ਜਿ਼ੰਮੇਵਾਰੀ ਚੰਗੀ ਤਰ੍ਹਾਂ ਨਿਭਾਉਣ।ਉਨ੍ਹਾਂ ਆਖਿਆ ਕਿ ਇਸ ਵਿੱਚ ਕੋਈ ਸ਼ੱਕ ਨਹੀਂ ਕਿ ਏਅਰਲਾਈਨਜ਼ ਬਹੁਤ ਮਿਹਨਤ ਕਰ ਰਹੀਆਂ ਹਨ ਪਰ ਅਸੀਂ ਚਾਹੁੰਦੇ ਹਾਂ ਕਿ ਏਅਰਲਾਈਨਜ਼ ਤੇ ਏਅਰਪੋਰਟ ਆਪਣੀ ਭੂਮਿਕਾ ਚੰਗੀ ਤਰ੍ਹਾਂ ਨਿਭਾਉਣ।
ਇਹ ਪੁੱਛੇ ਜਾਣ ਉੱਤੇ ਕਿ ਸਟਾਫ ਦੇ ਮੁੱਦੇ ਨੂੰ ਹੱਲ ਕਰਨ ਲਈ ਉਹ ਕੀ ਕਰਨਗੇ, ਤਾਂ ਅਲਘਬਰਾ ਨੇ ਆਖਿਆ ਕਿ ਹੁਣ ਏਅਰ ਪੈਸੈਂਜਰ ਬਿੱਲ ਆਫ ਰਾਈਟਸ ਆ ਗਿਆ ਹੈ ਜਿਸ ਤਹਿਤ ਏਅਰਲਾਈਨਜ਼ ਨੂੰ ਇੱਕ ਖਾਸ ਪੱਧਰ ਤੱਕ ਸੇਵਾ ਮੁਹੱਈਆ ਕਰਵਾਉਣੀ ਪੈਂਦੀ ਹੈ।ਮੰਤਰੀ ਨੇ ਆਖਿਆ ਕਿ ਫੈਡਰਲ ਸਰਕਾਰ ਨੇ ਹੋਰ ਬਾਰਡਰ ਏਜੰਟ ਤੇ 900 ਨਵੇਂ ਸਕ੍ਰੀਨਰਜ਼ ਭਰਤੀ ਕਰਕੇ ਆਪਣੀ ਜਿ਼ੰਮੇਵਾਰੀ ਨਿਭਾਈ ਹੈ। ਅਲਘਬਰਾ ਨੇ ਆਖਿਆ ਕਿ ਬਹੁਤ ਸਾਰੇ ਨਵੇਂ ਵਰਕਰ ਟਰੇਨਿੰਗ ਕਰ ਰਹੇ ਹਨ ਤੇ ਕਈਆਂ ਨੇ ਟਰੇਨਿੰਗ ਲੈ ਲਈ ਹੈ।ਕਈਆਂ ਨੇ ਤਾਂ ਕੰਮ ਵੀ ਸ਼ੁਰੂ ਕਰ ਦਿੱਤਾ ਹੈ।