ਓਟਵਾ, 20 ਜੂਨ (ਪੋਸਟ ਬਿਊਰੋ) : ਸੋਮਵਾਰ ਨੂੰ ਰੱਖਿਆ ਮੰਤਰੀ ਅਨੀਤਾ ਆਨੰਦ ਨੇ ਨੌਰਥ ਅਮਰੀਕਾ ਦੇ ਉਮਰਦਰਾਜ਼ ਹੋ ਚੁੱਕੇ ਰੱਖਿਆ ਸਿਸਟਮ ਨੂੰ ਆਧੁਨਿਕ ਰੂਪ ਦੇਣ ਲਈ ਅਗਲੇ 20 ਸਾਲਾਂ ਵਿੱਚ 4·9 ਬਿਲੀਅਨ ਡਾਲਰ ਖਰਚ ਕਰਨ ਦਾ ਵਾਅਦਾ ਕੀਤਾ। ਇਹ ਐਲਾਨ ਆਪਣੇ ਆਪ ਵਿੱਚ ਬਹੁਤ ਵੱਡਾ ਹੈ ਪਰ ਇਸ ਵਿੱਚ ਕਈ ਤਰ੍ਹਾਂ ਦੇ ਵੇਰਵੇ ਨਹੀਂ ਦਿੱਤੇ ਗਏ।
ਜਿ਼ਕਰਯੋਗ ਹੈ ਕਿ ਪਿਛਲੇ ਲੰਮੇਂ ਸਮੇਂ ਤੋਂ ਸੀਨੀਅਰ ਕੈਨੇਡੀਅਨ ਤੇ ਅਮੈਰੀਕਨ ਮਿਲਟਰੀ ਅਧਿਕਾਰੀ ਇਹ ਚੇਤਾਵਨੀ ਦਿੰਦੇ ਆਏ ਹਨ ਕਿ ਮਹਾਂਦੀਪ ਉੱਤੇ ਹੋਣ ਵਾਲੇ ਕਿਸੇ ਵੀ ਹਮਲੇ ਦੀ ਪਛਾਣ ਕਰਨਾ ਤੇ ਉਸ ਨੂੰ ਰੋਕਣਾ ਮੌਜੂਦਾ ਡਿਫੈਂਸਿਵ ਸਿਸਟਮ ਦੇ ਵੱਸ ਦੀ ਗੱਲ ਨਹੀਂ ਹੈ। ਆਨੰਦ ਵੱਲੋਂ ਇੱਕ ਤਰ੍ਹਾਂ ਇਸ ਖਤਰੇ ਨੂੰ ਧਿਆਨ ਵਿੱਚ ਰੱਖਕੇ ਇਸ ਤਰ੍ਹਾਂ ਦੇ ਨਿਵੇਸ਼ ਦਾ ਐਲਾਨ ਕੀਤਾ ਗਿਆ ਹੈ ਪਰ ਅਜੇ ਇਹ ਨਹੀਂ ਪਤਾ ਕਿ ਇਹ ਨਿਵੇਸ਼ ਕਦੋਂ ਅਮਲੀ ਰੂਪ ਲਵੇਗਾ।
ਕੈਨੇਡੀਅਨ ਸੈਨਾਵਾਂ ਦੇ ਟ੍ਰੈਂਟਨ ਸਥਿਤ ਟਿਕਾਣੇ ਉੱਤੇ ਸੀਐਫ-18 ਲੜਾਕੂ ਜੈੱਟ ਸਮੇਤ ਕਈ ਮਿਲਟਰੀ ਜਹਾਜ਼ਾਂ ਦੇ ਸਾਹਮਣੇ ਖੜ੍ਹੇ ਹੋ ਕੇ ਆਨੰਦ ਨੇ ਇਹ ਐਲਾਨ ਕੀਤਾ। ਉਨ੍ਹਾਂ ਆਖਿਆ ਕਿ ਮਹਾਂਦੀਪ ਦੀ ਰਾਖੀ ਲਈ ਕੈਨੇਡਾ ਅਗਲੇ ਛੇ ਸਾਲਾਂ ਵਿੱਚ 4·9 ਬਿਲੀਅਨ ਡਾਲਰ ਖਰਚ ਕਰੇਗਾ।ਉਨ੍ਹਾਂ ਆਖਿਆ ਕਿ ਪਿਛਲੇ ਚਾਰ ਦਹਾਕਿਆਂ ਤੋਂ ਕੈਨੇਡੀਅਨ ਪਰੀਪੇਖ ਤੋਂ ਜੇ ਵੇਖਿਆ ਜਾਵੇ ਤਾਂ ਨੋਰਾਡ ਵਾਸਤੇ ਇਹ ਬਹੁਤ ਹੀ ਅਹਿਮ ਅਪਗ੍ਰੇਡ ਹੈ। ਉਨ੍ਹਾਂ ਅੱਗੇ ਆਖਿਆ ਕਿ ਇਸ ਫੌਰੀ ਨਿਵੇਸ਼ ਦੇ ਨਾਲ ਨਾਲ ਇਸ ਯੋਜਨਾ ਉੱਤੇ ਲੰਮੇਂ ਸਮੇਂ ਲਈ ਵੀ ਖਰਚ ਕੀਤਾ ਜਾਵੇਗਾ। ਇਸ ਯੋਜਨਾ ਉੱਤੇ 20 ਸਾਲਾਂ ਵਿੱਚ ਕੁੱਲ ਮਿਲਾ ਕੇ 40 ਬਿਲੀਅਨ ਡਾਲਰ ਖਰਚੇ ਜਾਣਗੇ। ਇਸ ਨਾਲ ਕੈਨੇਡੀਅਨਜ਼ ਦੀਆਂ ਆਉਣ ਵਾਲੀਆਂ ਕਈ ਪੀੜ੍ਹੀਆਂ ਮਹਿਫੂਜ਼ ਹੋ ਜਾਣਗੀਆਂ।
ਆਨੰਦ ਨੇ ਪੰਜ ਖੇਤਰਾਂ ਦੀ ਗੱਲ ਕੀਤੀ ਜਿਨ੍ਹਾਂ ਵਿੱਚ ਇਹ ਨਿਵੇਸ਼ ਕੀਤਾ ਜਾਵੇਗਾ। ਇਸ ਦੌਰਾਨ ਸਰਵੇਲੈਂਸ ਸਿਸਟਮ- ਜਿਸ ਵਿੱਚ ਲਾਂਗ ਰੇਂਜ ਵਾਲੇ ਰਡਾਰ ਤੇ ਸੈਂਸਰ ਸ਼ਾਮਲ ਹੋਣਗੇ-ਜਿਹੜੇ ਆਰਕਟਿਕ ਵੱਲੋਂ ਆਉਣ ਵਾਲੇ ਕਿਸੇ ਵੀ ਤਰ੍ਹਾਂ ਦੇ ਖਤਰੇ ਨੂੰ ਪਛਾਣ ਲੈਣਗੇ।ਨਵਾਂ ਸਿਸਟਮ ਨੌਰਥ ਵਾਰਨਿੰਗ ਸਿਸਟਮ ਨੂੰ ਬਦਲੇਗਾ।ਇਹ ਪੁਰਾਣਾ ਸਿਸਟਮ 1980ਵਿਆਂ ਵਿੱਚ ਰੂਸੀ ਬੰਬਾਰਾਂ ਦੀ ਪਛਾਣ ਕਰਨ ਲਈ ਤਿਆਰ ਕੀਤਾ ਗਿਆ ਸੀ।ਪਰ ਨਾ ਹੀ ਆਨੰਦ ਤੇ ਨਾ ਹੀ ਚੀਫ ਆਫ ਦ ਡਿਫੈਂਸ ਸਟਾਫ ਜਨਰਲ ਵੇਅਨ ਆਇਰ ਜਾਂ ਨੋਰਾਡ ਦੇ ਡਿਪਟੀ ਕਮਾਂਡਰ ਲੈਫਟੀਨੈਂਟ ਜਨਰਲ ਐਲੇਨ ਪੈਲੇਤੀਅਰ ਵੱਲੋਂ ਇਹ ਜਾਣਕਾਰੀ ਦਿੱਤੀ ਗਈ ਕਿ ਨੌਰਥ ਵਾਰਨਿੰਗ ਸਿਸਟਮ ਨੂੰ ਕਦੋਂ ਬਦਲਿਆ ਜਾਵੇਗਾ।