ਇਸਲਾਮਾਬਾਦ, 23 ਮਈ (ਪੋਸਟ ਬਿਊਰੋ)- ਪਾਕਿਸਤਾਨ ਦੇ ਸਾਬਕਾ ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ ਨੇ ਅਮਰੀਕਾ ਦੀ ਅਗਵਾਈ ਵਾਲੇ ਕਵਾਡ ਗਠਜੋੜ ਦਾ ਪ੍ਰਮੁੱਖ ਮੈਂਬਰ ਹੋਣ ਦੇ ਬਾਵਜੂਦ ਰੂਸ ਤੋਂ ਰਿਆਇਤੀ ਤੇਲ ਖ਼ਰੀਦਣ ਲਈ ਇੱਕ ਵਾਰ ਫਿਰ ਭਾਰਤ ਦੀ ਤਾਰੀਫ਼ ਕੀਤੀ ਹੈ, ਜਿਸ ਤੋਂ ਪਾਕਿਸਤਾਨ ਵਿੱਚ ਹਲਚਲ ਹੈ।
ਡਾਨ ਨਿਊਜ਼ ਨੇ ਇੱਕ ਟਵੀਟ ਵਿੱਚ ਇਮਰਾਨ ਦੇ ਹਵਾਲੇ ਨਾਲ ਕਿਹਾ ਕਿ ਕਵਾਡ ਦਾ ਹਿੱਸਾ ਹੋਣ ਦੇ ਬਾਵਜੂਦ ਭਾਰਤ ਨੇ ਅਮਰੀਕਾ ਉੱਤੇ ਦਬਾਅ ਕਾਇਮ ਰੱਖਿਆ ਅਤੇ ਜਨਤਾ ਨੂੰ ਰਾਹਤ ਦੇਣ ਲਈ ਛੋਟ ਵਾਲਾ ਰੂਸੀ ਤੇਲ ਖ਼ਰੀਦ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਉਹ ਕੰਮ ਹੈ, ਜੋ ਸਾਡੀ ਸਰਕਾਰ ਇੱਕ ਸੁਤੰਤਰ ਵਿਦੇਸ਼ ਨੀਤੀ ਦੀ ਮਦਦ ਨਾਲ ਪ੍ਰਾਪਤ ਕਰਨ ਲਈ ਕਰ ਰਹੀ ਹੈ।ਇੱਕ ਹੋਰ ਟਵੀਟ ਵਿੱਚ ਇਮਰਾਨ ਨੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਲਈ ਪਾਕਿਸਤਾਨ ਦੇ ਹਿੱਤ ਸਰਬ ਉਚ ਸੀ, ਪਰ ਬਦਕਿਸਮਤੀ ਨਾਲ ਸਥਾਨਕ ਮੀਰ ਜਾਫ਼ਰ ਤੇ ਮੀਰ ਸਾਦਿਕ ਬਾਹਰੀ ਦਬਾਅ ਅੱਗੇ ਝੁੱਕ ਗਏ, ਜਿਸ ਨੇ ਇੱਕ ਸ਼ਾਸਨ ਬਦਲਣ ਲਈ ਮਜ਼ਬੂਰ ਕੀਤਾ ਅਤੇ ਫਿਰ ਅਰਥਵਿਵਸਥਾ ਨਾਲ ਇੱਕ ਸਿਰ ਰਹਿਤ ਮੁਰਗੇ ਵਾਂਗ ਘੁੰਮ ਰਹੇ ਹਨ। ਸਾਬਕਾ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਨੇ ਆਪਣੇ ਟਵੀਟ ਉੱਤੇ ਦੱਖਣੀ ਏਸ਼ੀਆ ਸੂਚਕਾਂਕ ਦੀ ਰਿਪੋਰਟ ਨੂੰ ਟੈਗ ਕਰਦੇ ਹੋਏ ਕਿਹਾ ਕਿ ਰੂਸ ਤੋਂ ਛੋਟ ਵਾਲਾ ਤੇਲ ਖ਼ਰੀਦਣ ਪਿੱਛੋਂ ਭਾਰਤ ਸਰਕਾਰ ਨੇ ਪਟਰੌਲ ਦੀ ਕੀਮਤ 9.5 ਰੁਪਏ ਪ੍ਰਤੀ ਲੀਟਰ ਘਟਾ ਦਿੱਤੀ ਹੈ, ਡੀਜ਼ਲ ਦੀ ਕੀਮਤ ਸੱਤ ਰੁਪਏ ਲੀਟਰ ਘਟਾਈ ਹੈ। ਵਾਸ਼ਿੰਗਟਨ ਵਿਖੇ ਵਿਲਸਨ ਸੈਂਟਰ ਵਿੱਚ ਦੱਖਣੀ ਏਸ਼ੀਆਈ ਮਾਮਲਿਆਂ ਦੇ ਵਿਦਵਾਨ ਮਾਈਕਲ ਕੁਗਲਮੈਨ ਨੇ ਵੀ ਇਸ ਰਿਪੋਰਟ ਦਾ ਹਵਾਲਾ ਦਿੰਦੇ ਹੋਏ ਕਿਹਾ ਕਿ ਇਹੀ ਕਾਰਨ ਹੈ ਕਿ ਇਮਰਾਨ ਪ੍ਰਧਾਨ ਮੰਤਰੀ ਵਜੋਂ ਆਪਣੇ ਆਖ਼ਰੀ ਦਿਨਾਂ ਦੌਰਾਨ ਭਾਰਤ ਦੀ ਤਾਰੀਫ਼ ਕਰ ਰਹੇ ਸਨ। ਉਨ੍ਹਾਂ ਦੱਸਿਆ ਕਿ ਇਮਰਾਨ ਰੂਸ ਤੋਂ ਕਣਕ ਅਤੇ ਗੈਸ ਦੀ ਦਰਾਮਦ ਕਰਨਾ ਚਾਹੁੰਦਾ ਸੀ।