* ਮਮਤਾ ਬੈਨਰਜੀ ਸਰਕਾਰ ਦੇ ਦੋ ਮੰਤਰੀ ਵੀ ਘੋਟਾਲੇ ਵਿੱਚ ਫਸੇ
ਕੋਲਕਾਤਾ, 22 ਮਈ (ਪੋਸਟ ਬਿਊਰੋ)- ਕਿਸੇ ਸਰਕਾਰੀ ਵਿਭਾਗ ਜਾਂ ਯੋਜਨਾਵਾਂ ਵਿੱਚ ਹੋਈ ਗੜਬੜ ਤੇ ਭਿ੍ਰਸ਼ਟਾਚਾਰ ਨੂੰ ਸਾਹਮਣੇ ਲਿਆਉਣ ਲਈ ਸੂਚਨਾ ਦਾ ਅਧਿਕਾਰ (ਆਰ ਟੀ ਆਈ) ਕਾਨੂੰਨ ਦੀ ਵਰਤੋਂ ਕੀਤੀ ਜਾਂਦੀ ਹੈ,ਪਰ ਬੰਗਾਲ ਵਿੱਚ ਘੋਟਾਲਾ ਕਰਨ ਲਈ ਇਸ ਨੂੰ ਹਥਿਆਰ ਬਣਾ ਕੇ ਵਰਤਿਆ ਗਿਆ ਹੈ।
ਇਸ ਸਮੇਂ ਬੰਗਾਲ ਵਿੱਚ ਸਕੂਲ ਸਰਵਿਸਕਮਿਸ਼ਨ (ਐਸ ਏ ਸੀ) ਦੇ ਰਾਹੀਂ ਹੋਈ ਨਿਯੁਕਤੀ ਦੀ ਸੀ ਬੀ ਆਈ ਜਾਂਚ ਚੱਲ ਰਹੀ ਹੈ। ਮਮਤਾ ਬੈਨਰਜੀ ਸਰਕਾਰ ਦੇ ਦੋ ਮੰਤਰੀ ਇਸ ਵਿੱਚ ਫੱਸੇ ਹੋਏ ਹਨ ਅਤੇ ਦੋਵਾਂ ਕੋਲੋਂ ਸੀ ਬੀ ਆਈ ਪੁੱਛਗਿੱਛ ਕਰ ਰਹੀ ਹੈ। ਸਿੱਖਿਆ ਰਾਜ ਮੰਤਰੀ ਪਰੇਸ਼ ਚੰਦਰ ਅਧਿਕਾਰੀ ਅਤੇ ਉਸ ਦੀ ਧੀ ਖਿਲਾਫ ਸੀ ਬੀ ਆਈ ਨੇ ਕੇਸ ਦਰਜ ਕੀਤਾ ਹੈ।ਨੌਕਰੀ ਲੈਣ ਤੋਂ ਵਾਂਝੀ ਰਹੀ ਬਬੀਤਾ ਬਰਮਨ ਨੇ ਹਾਈ ਕੋਰਟ ਵਿੱਚ ਅਰਜ਼ੀ ਪੇਸ਼ ਕੀਤੀ ਸੀ। ਉਸ ਨੇ ਕਿਹਾ ਸੀ ਕਿ ਸਿੱਖਿਆ ਰਾਜ ਮੰਤਰੀ ਦੀ ਧੀ ਦਾ ਮੈਰਿਟ ਲਿਸਟ ਵਿੱਚ ਨਾਂਅ ਨਹੀਂ ਸੀ, ਪਰ ਉਸ ਦੀ ਨਿਯੁਕਤੀ ਕੀਤੀ ਗਈ ਹੈ। ਇਸ ਮਾਮਲੇ ਵਿੱਚ ਉਦਯੋਗ ਤੇ ਪਾਰਲੀਮੈਂਟਰੀ ਮਾਮਲਿਆਂ ਦੇ ਮੰਤਰੀ ਅਤੇ ਸਾਬਕਾ ਸਿੱਖਿਆ ਮੰਤਰੀ ਪਾਰਥ ਚੈਟਰਜੀ ਫਸ ਗਏ ਹਨ। ਜਾਂਚ ਵਿੱਚ ਪਤਾ ਲੱਗਾ ਕਿ ਐਸ ਐਸ ਸੀ ਦੇ ਅਧਿਕਾਰੀਆਂ ਨੇ ਚੋਣਵੇਂ ਉਮੀਦਵਾਰਾਂ ਨੂੰ ਆਪਣੀ ਓ ਐਮ ਆਰ (ਆਪਟੀਕਲ ਮਾਰਕ ਰੈਕੇਗਨਿਸ਼ਨ) ਸ਼ੀਟ ਲਈ ਆਰ ਟੀ ਆਈ ਦਾਖਲ ਕਰਨ ਅਤੇ ਦੁਬਾਰਾ ਮੁੱਲਾਂਕਣ ਦੇ ਲਈ ਅਰਜ਼ੀ ਦੇਣ ਲਈ ਕਿਹਾ। ਉਨ੍ਹਾਂ ਅਰਜ਼ੀਆਂ ਉੱਤੇ ਅਧਿਕਾਰੀਆਂ ਨੇ ਕੁਝ ਉਮੀਦਵਾਰਾਂ ਦੇ ਨੰਬਰ ਵਧਾ ਕੇ ਉਨ੍ਹਾਂ ਨੂੰ ਉਚਾ ਰੈਂਕ ਦੇਣ ਲਈ ਓ ਐਮ ਆਰ ਸ਼ੀਟ ਵਿੱਚ ਹੇਰਾਫੇਰੀ ਕੀਤੀ। ਉਨ੍ਹਾਂ ਨੇ ਅਸਫਲ ਉਮੀਦਵਾਰਾਂ ਨੂੰ ਨਿਯੁਕਤੀ ਸੂਚੀ ਵਿੱਚ ਲਿਆਉਣ ਲਈ ਉਨ੍ਹਾਂ ਦੇ ਨੰਬਰ ਬਦਲੇ ਅਤੇ ਓ ਐਮ ਆਰ ਸ਼ੀਟ ਨੂੰ ਨਸ਼ਟ ਕਰ ਦਿੱਤਾ।
ਪਟੀਸ਼ਨਰ ਦੇ ਵਕੀਲ ਨੇ ਕਿਹਾ ਕਿ ਕੁਝ ਉਮੀਦਵਾਰਾਂ ਦੇ ਨੰਬਰ ਵਧਾਉਣ ਲਈ ਆਰ ਟੀ ਆਈ ਨੂੰ ਹਥਿਆਰ ਦੇ ਰੂਪ ਵਿੱਚ ਵਰਤਿਆ ਹੈ। ਸੀ ਬੀ ਆਈ ਨੇ ਪੱਛਮੀ ਬੰਗਾਲ ਸਕੂਲ ਸੇਵਾ ਕਮਿਸ਼ਨ ਦੇ ਪੰਜ ਸਾਬਕਾ ਸੀਨੀਅਰ ਅਫਸਰਾਂ ਖਿਲਾਫ ਨਵੇਂ ਸਿਰੇ ਤੋਂ ਕੇਸ ਦਰਜ ਕੀਤਾ ਹੈ। ਇਹ ਸਾਰੇ ਸਕਰੀਨਿੰਗ ਕਮੇਟੀ ਦੇ ਮੈਂਬਰ ਸਨ ਅਤੇ ਸੀ ਬੀ ਆਈ ਪਾਰਥ ਚੈਟਰਜੀ ਅਤੇ ਅਧਿਕਾਰੀਆਂ ਨੂੰ ਆਹਮੋ-ਸਾਹਮਣੇ ਬਿਠਾ ਕੇ ਪੁੱਛਗਿੱਛ ਕਰਨ ਦੀ ਤਿਆਰੀ ਕਰ ਰਹੀ ਹੈ।