ਕਾਂਸ, 22 ਮਈ (ਪੋਸਟ ਬਿਊਰੋ)- ਕਾਂਸ ਕੌਮਾਂਤਰੀ ਫਿਲਮ ਸਮਾਰੋਹ ਵਿੱਚ ਸ਼ੁੱਕਰਵਾਰ ਰਾਤ ਉਸ ਸਮੇਂ ਸਨਸਨੀ ਫੈਲ ਗਈ ਜਦ ਰੂਸ ਦੇ ਹਮਲੇ ਤੋਂ ਬਾਅਦ ਤੋਂ ਯੂਕਰੇਨ ਵਿੱਚ ਔਰਤਾਂ ਨਾਲ ਸੈਕਸ ਹਿੰਸਾ ਦਾ ਵਿਰੋਧ ਪ੍ਰਗਟਾਉਣ ਲਈ ਇੱਕ ਅਰਧ ਨਗਨ ਔਰਤ ਪ੍ਰਦਰਸ਼ਨਕਾਰੀ ਰੈਡ ਕਾਰਪੈਟ ਉਤੇ ਪਹੁੰਚ ਗਈ ਅਤੇ ਉਥੇ ਫੋਟੋਗਰਾਫਰਾਂ ਸਾਹਮਣੇ ਚੀਕਦੇ ਹੋਏ ਉਸ ਨੇ ਆਪਣੇ ਸਾਰੇ ਕੱਪੜੇ ਉਤਾਰ ਦਿੱਤੇ।ਔਰਤ ਨੇ ਆਪਣੇ ਸਰੀਰ ਉਤੇ ਯੂਕਰੇਨ ਦੇ ਝੰਡੇ ਵਾਲਾ ਰੰਗ ਕੀਤਾ ਹੋਇਆ ਸੀ ਅਤੇ ਆਪਣੀ ਛਾਤੀ ਤੇ ਢਿੱਡ ਉੱਤੇ ਲਿਖਿਆ ਹੋਇਆ ਸੀ, ‘ਸਾਡੇ ਨਾਲ ਬਲਾਤਕਾਰ ਬੰਦ ਕਰੋ।'
ਇਸ ਔਰਤ ਨੇ ਪਿੱਠ ਦੇ ਹੇਠਲੇ ਹਿੱਸੇ ਅਤੇ ਲੱਤਾਂ ਉਤੇ ਲਾਲ ਰੰਗ ਲਗਾਇਆ ਹੋਇਆ ਸੀ ਅਤੇ ਉਸ ਦੀ ਪਿੱਠ ਉੱਤੇ ‘ਐਸ ਸੀ ਯੂ ਐਮ' ਲਿਖਿਆ ਹੋਇਆ ਸੀ। ਅਰਧ ਨਗਨ ਔਰਤ ਦੇ ਇਸ ਤਰ੍ਹਾਂ ਹੈਰਾਨੀਜਨਕ ਤੌਰ ਉੱਤੇ ਰੈਡ ਕਾਰਪੈਟ ਉੱਤੇ ਆਉਣ ਨਾਲ ਸਾਰੇ ਹੈਰਾਨ ਰਹਿ ਗਏ ਅਤੇ ਸੁਰੱਖਿਆ ਗਾਰਡ ਉਸ ਵੱਲ ਦੌੜੇ ਅਤੇ ਉਸ ਨੂੰ ਕੋਟ ਨਾਲ ਢੱਕ ਕੇ ਇੱਕ ਪਾਸੇ ਲੈ ਗਏ।ਯੂਕਰੇਨ ਵਿੱਚ ਰੂਸ ਦੀ ਫੌਜੀ ਮੁਹਿੰਮ ਦੇ ਸ਼ੁਰੂ ਤੋਂ ਰੂਸੀ ਫੌਜੀਆਂ ਵੱਲੋਂ ਯੂਕਰੇਨੀ ਔਰਤਾਂ ਨਾਲ ਬਲਾਤਕਾਰ ਦੀਆਂ ਕਈ ਖਬਰਾਂ ਆ ਰਹੀਆਂ ਹਨ। ਯੂਕਰੇਨੀ ਰਾਸ਼ਟਰਪਤੀ ਵਲਾਦੀਮੀਰ ਜੇਲੇਂਸਕੀ ਨੇ ਕਾਂਸ ਫਿਲਮ ਸਮਾਰੋਹ ਵਿੱਚ ਆਪਣੇ ਲਾਈਵ ਸੰਬੋਧਨ ਵਿੱਚ ਫਿਲਮਕਾਰਾਂ ਨੂੰ ਤਾਨਾਸ਼ਾਹਾਂ ਦਾ ਸਾਹਮਣਾ ਕਰਨਾ ਦਾ ਸੱਦਾ ਦਿੱਤਾ ਸੀ।