ਯੈਲੋਨਾਈਫ, 20 ਮਈ (ਪੋਸਟ ਬਿਊਰੋ) : ਪ੍ਰਿੰਸ ਚਾਰਲਸ ਤੇ ਡੱਚੈੱਸ ਆਫ ਕੌਰਨਵਾਲ ਕੈਮਿਲਾ ਦਾ ਤਿੰਨ ਰੋਜ਼ਾ ਕੈਨੇਡਾ ਦੌਰਾ ਭਾਵੇਂ ਮੁੱਕ ਗਿਆ ਹੈ ਪਰ ਮੂਲਵਾਸੀ ਲੋਕਾਂ ਨਾਲ ਸੁਲ੍ਹਾ ਸਬੰਧੀ ਮੰਗ ਅਜੇ ਨਹੀਂ ਮੁੱਕੀ ਹੈ।
ਆਪਣੇ ਤਿੰਨ ਰੋਜ਼ਾ ਕੈਨੇਡਾ ਦੌਰੇ ਤੋਂ ਬਾਅਦ ਵੀਰਵਾਰ ਰਾਤ ਨੂੰ ਇਹ ਸ਼ਾਹੀ ਜੋੜਾ ਬ੍ਰਿਟੇਨ ਪਰਤ ਗਿਆ। ਇਸ ਦੌਰੇ ਦੀ ਸੁ਼ਰੂਆਤ ਸੇਂਟ ਜੌਹਨਜ਼, ਨਿਊਫਾਊਂਡਲੈਂਡ ਐਂਡ ਲੈਬਰਾਡੌਰ ਤੋਂ ਰੈਜ਼ੀਡੈਂਸ਼ੀਅਲ ਸਕੂਲ ਨਾਲ ਸਬੰਧਤ ਮੌਤਾਂ ਤੋਂ ਹੋਈ ਤੇ ਇਸ ਦਾ ਅੰਤ ਉੱਤਰ ਵਿੱਚ ਕਲਾਈਮੇਟ ਚੇਂਜ ਦੇ ਮੁੱਦੇ ਉੱਤੇ ਫਰਸਟ ਨੇਸ਼ਨਜ਼ ਚੀਫਜ਼ ਨਾਲ ਮੁਲਾਕਾਤ ਨਾਲ ਹੋਇਆ।
ਪ੍ਰਿੰਸ ਚਾਰਲਸ ਨੇ ਯੈਲੋਨਾਈਫ ਦੇ ਲੋਕਾਂ ਨੂੰ ਦੱਸਿਆ ਕਿ ਰੈਜ਼ੀਡੈਂਸ਼ੀਅਲ ਸਕੂਲ ਸਰਵਾਈਵਰਜ਼ ਵੱਲੋਂ ਸੁਣਾਏ ਗਏ ਤਜ਼ਰਬਿਆਂ ਨਾਲ ਉਨ੍ਹਾਂ ਦਾ ਦਿਲ ਪਸੀਜ ਗਿਆ ਹੈ।ਇਸ ਦੌਰੇ ਤੋਂ ਪਹਿਲਾਂ ਅਸੈਂਬਲੀ ਆਫ ਫਰਸਟ ਨੇਸ਼ਨਜ਼ ਤੇ ਮੈਟਿਸ ਨੈਸ਼ਨਲ ਕਾਊਂਸਲ ਦੇ ਆਗੂਆਂ ਨੇ ਚਰਚ ਆਫ ਇੰਗਲੈਂਡ ਦੀ ਹੈੱਡ ਵਜੋਂ ਮਹਾਰਾਣੀ ਤੋਂ ਮੁਆਫੀ ਦੀ ਮੰਗ ਕੀਤੀ ਸੀ।
ਪਰ ਇਸ ਸਬੰਧ ਵਿੱਚ ਕੋਈ ਗੱਲ ਨਾ ਕਰਦਿਆਂ ਪ੍ਰਿੰਸ ਨੇ ਆਖਿਆ ਕਿ ਕਮਿਊਨਿਟੀ ਮੈਂਬਰ ਤੇ ਆਗੂ ਹਰ ਮੁਕਾਮ ਉੱਤੇ ਸੁਲ੍ਹਾ ਦੀ ਅਹਿਮੀਅਤ ਉੱਤੇ ਜ਼ੋਰ ਦਿੰਦੇ ਰਹੇ ਹਨ।