ਨਾਗਪੁਰ, 19 ਮਈ (ਪੋਸਟ ਬਿਊਰੋ)- ਰਾਸ਼ਟਰੀ ਸਵੈ-ਸੇਵਕ ਸੰਘ (ਆਰ ਐਸ ਐਸ) ਦੇ ਨਾਗਪੁਰ ਹੈਡ ਕੁਆਰਟਰ ਡਾਕਟਰ ਹੈਡਗੇਵਾਰ ਸਮਰਿਤੀ ਭਵਨ ਦੀ ਰੇਕੀ ਕਰਨ ਦੇ ਦੋਸ਼ ਵਿੱਚ ਅਤਿਵਾਦ ਰੋਕੂੂ ਦਸਤੇ (ਏ ਟੀ ਐਸ) ਨੇ ਜੰਮੂ ਕਸ਼ਮੀਰ ਤੋਂ ਜੈਸ਼-ਏ-ਮੁਹੰਮਦ ਦੇ ਇੱਕ ਅਤਿਵਾਦੀ ਨੂੰ ਗ਼੍ਰਿਫ਼ਤਾਰ ਕੀਤਾ ਹੈ।
ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਦੋਸ਼ੀ ਸ਼ੇਖ ਨੇ ਨਾਗਪੁਰ ਦੇ ਰੇਸ਼ਮੀਬਾਗ ਇਲਾਕੇ ਵਿੱਚ ਹੇਡਗੇਵਾਰ ਸਮਰਿਤੀ ਭਵਨ ਦੀ ਰੇਕੀ ਕੀਤੀ ਤੇ ਭਵਨ ਦਾ ਵੀਡੀਓ ਪਾਕਿਸਤਾਨ ਵਿੱਚ ਆਪਣੇ ਹੈਂਡਲਰ ਨੂੰ ਭੇਜਿਆ ਸੀ। ਅਧਿਕਾਰੀ ਨੇ ਕਿਹਾ ਕਿ ਏ ਟੀ ਐਸ ਨੇ ਪਿੱਛੇ ਜਿਹੇ ਜੰਮੂ ਕਸ਼ਮੀਰ ਦੇ ਪੁਲਵਾਮਾ ਜ਼ਿਲ੍ਹੇ ਦੇ ਅਵੰਤੀਪੋਰਾ ਦੇ ਵਾਸੀ ਰਈਸ ਅਹਿਮਦ ਸ਼ੇਖ (26) ਨੂੰ ਹਿਰਾਸਤ ਵਿੱਚ ਲਿਆ ਅਤੇ ਪਿਛਲੇ ਦੋ ਦਿਨਾਂ ਤੋਂ ਉਸ ਤੋਂ ਪੁੱਛ-ਗਿੱਛ ਕੀਤੀ ਜਾ ਰਹੀ ਹੈ।ਸ਼ੇਖ ਨੇ ਜਾਂਚਕਰਤਾਵਾਂ ਨੂੰ ਦੱਸਿਆ ਕਿ ਉਮਰ ਨਾਮੀ ਇੱਕ ਵਿਅਕਤੀ ਉਸ ਦਾ ਹੈਂਡਲਰ ਹੈ। ਉਮਰ ਬਾਰੇ ਕਿਹਾ ਜਾਂਦਾ ਹੈ ਕਿ ਉਹ ਪਾਕਿਸਤਾਨ ਦੇ ਨਵਾਬਪੁਰ ਵਿੱਚ ਜੈਸ਼-ਏ-ਮੁਹੰਮਦ ਦਾ ਆਪਰੇਸ਼ਨਲ ਕਮਾਂਡਰ ਹੈ। ਅਧਿਕਾਰੀ ਨੇ ਕਿਹਾ ਕਿ ਸ਼ੇਖ 23 ਜੁਲਾਈ 2021 ਨੂੰ ਦਿੱਲੀ-ਮੁੰਬਈ-ਨਾਗਪੁਰ ਦੀ ਉਡਾਣ ਨਾਲ ਇੱਥੇ ਪੁੱਜਾ ਅਤੇ ਸੀਤਾਬੁਲਡੀ ਖੇਤਰਦੇ ਇੱਕ ਹੋਟਲ ਵਿੱਚ ਰੁਕਿਆ ਸੀ। ਸ਼ੇਖ ਨੂੰ ਉਸਦੇ ਹੈਂਡਲਰ ਨੇ ਭਰੋਸਾ ਦਿੱਤਾ ਸੀ ਕਿ ਨਾਗਪੁਰ ਵਿੱਚ ਇੱਕ ਸਥਾਨਕ ਵਿਅਕਤੀ ਉਸ ਨਾਲ ਸੰਪਰਕ ਕਰੇਗਾ ਅਤੇ ਉਸ ਦੀ ਮਦਦ ਕਰੇਗਾ। ਅਧਿਕਾਰੀ ਨੇ ਕਿਹਾ ਕਿ ਨਾਗਪੁਰ ਵਿੱਚ ਸ਼ੇਖ ਨਾਲ ਕਿਸੇ ਨੇ ਸੰਪਰਕ ਨਹੀਂ ਕੀਤਾ, ਇਸ ਲਈ ਉਸ ਨੇ ਰੇਕੀ ਕਰਨ ਦਾ ਕੰਮ ਇਕੱਲੇਕੀਤਾ। ਉਨ੍ਹਾਂ ਕਿਹਾ ਕਿ 14 ਜੁਲਾਈ ਨੂੰ ਸ਼ੇਖ ਗੂਗਲ ਮੈਪ ਦੀ ਮਦਦ ਨਾਲ ਰੇਸ਼ਮੀਬਾਗ ਪਹੁੰਚਿਆ, ਜਿਸ ਦੀ ਲੋਕੇਸ਼ਨ ਉਸ ਨੂੰ ਉਸਦੇ ਆਕਾ ਨੇ ਦੱਸੀ ਸੀ।