ਕੋਲੰਬੋ, 19 ਮਈ (ਪੋਸਟ ਬਿਊਰੋ)- ਵਿੱਤੀ ਸੰਕਟ ਵਿੱਚ ਘਿਰੇ ਹੋਏ ਸ੍ਰੀਲੰਕਾ ਨੇ ਕੱਲ੍ਹ ਖੁਲਾਸਾ ਕੀਤਾ ਹੈ ਕਿ ਇਸ ਦੇਸ਼ ਦੇ ਸਮੁੰਦਰੀ ਤੱਟ ਉੱਤੇ ਪੈਟਰੋਲ ਲੈ ਕੇ ਖੜ੍ਹੇ ਜਹਾਜ਼ ਨੂੰ ਦੇਣ ਲਈ ਦੇਸ਼ ਕੋਲ ਵਿਦੇਸ਼ੀ ਕਰੰਸੀ ਨਹੀਂ ਬਚੀ। ਸਰਕਾਰ ਨੇ ਨਾਗਰਿਕਾਂ ਨੂੰ ਪੈਟਰੋਲ ਲਈ ਲਾਈਨਾਂ ਨਾ ਲਾਉਣ ਲਈ ਕਿਹਾ ਹੈ।
ਵਰਨਣ ਯੋਗ ਹੈ ਕਿ ਪੈਟਰੋਲ ਲੈ ਕੇ ਆਇਆ ਇੱਕ ਜਹਾਜ਼ 28 ਮਾਰਚ ਤੋਂ ਸ੍ਰੀਲੰਕਾ ਦੇ ਪਾਣੀਆਂ ਵਿੱਚ ਖੜ੍ਹਾ ਹੈ। ਬਿਜਲੀ ਅਤੇ ਊਰਜਾ ਮੰਤਰੀ ਨੇ ਪਾਰਲੀਮੈਂਟ ਨੂੰ ਦੱਸਿਆ ਕਿ ਦੇਸ਼ ਕੋਲ ਪੈਟਰੋਲ ਨਹੀਂ ਹੈ। ਉਨ੍ਹਾਂ ਕਿਹਾ, ‘‘ਸਾਡੇ ਕੋਲ ਪੈਟਰੋਲ ਦੇ ਜਹਾਜ਼ ਨੂੰ ਦੇਣ ਲਈ ਅਮਰੀਕੀ ਡਾਲਰ ਵੀ ਨਹੀਂ। ਜਨਵਰੀ 2022 ਵਿੱਚ ਆਏ ਇੱਕ ਜਹਾਜ਼ ਦੀ ਅਦਾਇਗੀ ਕੀਤੀ ਜਾਣੀ ਅਜੇ ਬਾਕੀ ਹੈ।'' ਮੰਤਰੀ ਨੇ ਕਿਹਾ ਕਿ ਸ਼ਿਪਿੰਗ ਕੰਪਨੀ ਨੇ ਅਦਾਇਗੀ ਹੋਣ ਤਕ ਪੈਟਰੋਲ ਨਾ ਦੇਣ ਨੂੰ ਕਿਹਾ ਹੈ। ਮੰਤਰੀ ਨੇ ਕਿਹਾ ਕਿ ਮੰਤਰਾਲਾ ਇੱਕ ਦੋ ਦਿਨਾਂ ਵਿੱਚ ਇਸ ਜਹਾਜ਼ ਲਈ ਪੈਸੇ ਦਾ ਪ੍ਰਬੰਧ ਕਰ ਲਵੇਗਾ। ਇਸ ਲਈ ਉਦੋਂ ਤੀਕ ਲੋਕਾਂ ਨੂੰ ਪੈਟਰੋਲ ਲਈ ਲਾਈਨਾਂ ਨਾ ਲਾਉਣ ਨੂੰ ਕਿਹਾ ਗਿਆ ਹੈ। ਉਨ੍ਹਾਂ ਨਾਲ ਹੀ ਕਿਹਾ ਕਿ ਸੀਮਿਤ ਸਟਾਕ ਹੋਣ ਕਾਰਨ ਪਹਿਲਾਂ ਇਹ ਜ਼ਰੂਰੀ ਸੇਵਾਵਾਂ ਲਈ ਦਿੱਤਾ ਜਾ ਰਿਹਾ ਹੈ।
ਭਾਰਤ ਨੇ ਇਸੇ ਮਹੀਨੇ ਸ੍ਰੀਲੰਕਾ ਲਈ 20 ਕਰੋੜ ਡਾਲਰ ਦੀ ਕਰੈਡਿਟ ਲਾਈਨ (ਪੈਸੇ ਉਧਾਰ ਦੇਣ ਦਾ ਪ੍ਰਬੰਧ) ਖੋਲ੍ਹੀ ਸੀ ਤਾਂ ਕਿ ਗੁਆਂਢੀ ਮੁਲਕ ਤੇਲ ਨਾਲ ਜੁੜੀਆਂ ਲੋੜਾਂ ਪੂਰੀਆਂ ਕਰ ਸਕੇ। ਇਸ ਤੋਂ ਪਹਿਲਾਂ ਵੀ ਭਾਰਤ ਨੇ ਸ੍ਰੀਲੰਕਾ ਦੀ ਮਦਦ ਕੀਤੀ ਹੈ। ਸ੍ਰੀਲੰਕਾ ਇਤਿਹਾਸ ਦੇ ਸਭ ਤੋਂ ਮਾੜੇ ਸੰਕਟ ਨਾਲ ਜੂਝ ਰਿਹਾ ਹੈ। ਅਹੁਦਾ ਛੱਡਣ ਵਾਲੇ ਸ੍ਰੀਲੰਕਾ ਦੇ ਸਾਬਕਾ ਪ੍ਰਧਾਨ ਮੰਤਰੀ ਮਹਿੰਦਾ ਰਾਜਪਕਸ਼ੇ ਕੱਲ੍ਹ ਅਸਤੀਫੇ ਦੇ ਬਾਅਦ ਪਹਿਲੀ ਵਾਰ ਪਾਰਲੀਮੈਂਟ ਵਿੱਚ ਆਏ।ਪ੍ਰਧਾਨ ਮੰਤਰੀ ਰਨਿਲ ਵਿਕਰਮਾਸਿੰਘੇ ਨੇ ਦੱਸਿਆ ਕਿ ਦੇਸ਼ ਨੂੰ ਵਿਸ਼ਵ ਬੈਂਕ ਤੋਂ ਵਿੱਤੀ ਮਦਦ ਮਿਲੀ ਹੈ ਅਤੇ ਅੱਗੋਂ ਏਸ਼ੀਅਨ ਡਿਵੈਲਪਮੈਂਟ ਬੈਂਕ ਤੋਂ ਮਦਦ ਮਿਲਣ ਦੀ ਸੰਭਾਵਨਾ ਹੈ, ਪਰ ਵਿਸ਼ਵ ਬੈਂਕ ਤੋਂ ਮਿਲੀ ਮਦਦ ਨਾਲ ਤੇਲ ਨਹੀਂ ਖਰੀਦਿਆ ਜਾ ਸਕਦਾ, ਪਰ ਪੈਸੇ ਵਰਤਣ ਲਈ ਹੋਰ ਰਾਹ ਤਲਾਸ਼ੇ ਜਾ ਰਹੇ ਹਨ।