* ਡੇਰੇ ਦੇ ਮਹੰਤ ਖ਼ਿਲਾਫ਼ ਮੁਕੱਦਮਾ ਤੇ 9 ਲੱਖ ਤੋਂ ਵੱਧ ਜੁਰਮਾਨਾ
ਸੰਗਰੂਰ, 18 ਮਈ (ਪੋਸਟ ਬਿਊਰੋ)- ਪਾਵਰਕਾਮ ਦੀ ਇਨਫੋਰਸਮੈਂਟ ਦੇ ਸੀਨੀਅਰ ਐਕਸੀਅਨ ਨੇ ਇੱਕ ਧਾਰਮਿਕ ਡੇਰੇ ਵਿੱਚੋਂ ਬਿਜਲੀ ਚੋਰੀ ਫੜੀ ਗਈ ਹੈ, ਜਿੱਥੇ 20-22 ਸਾਲਾਂ ਤੋਂ ਬਿਜਲੀ ਦਾ ਮੀਟਰ ਹੀ ਨਹੀਂ ਲੱਗਾ ਹੋਇਆ ਸੀ ਪਰ ਡੇਰੇ ਅੰਦਰ ਵੱਡੀ ਗਿਣਤੀ ਵਿੱਚ ਏ ਸੀ, ਕੂਲਰ, ਪੱਖੇ, ਲਾਈਟਾਂ ਦੀ ਵਰਤੋਂ ਦਿਨ-ਰਾਤ ਹੁੰਦੀ ਹੈ।
ਐਕਸੀਅਨ ਨੇ ਦੱਸਿਆ ਕਿ ਪਾਤੜਾਂ ਸ਼ਹਿਰ ਵਿੱਚ ਬੱਸ ਅੱਡੇ ਨੇੜੇ ਇੱਕ ਡੇਰਾ ‘ਬਾਬਾ ਸੋਟੇ ਵਾਲਾ’ ਵਿੱਚ ਬਿਜਲੀ ਚੋਰੀ ਬਾਰੇ ਕਿਸੇ ਨੇ ਮੁੱਖ ਮੰਤਰੀ ਭਗਵੰਤ ਮਾਨ ਦੇ ਸ਼ਿਕਾਇਤ ਨੰਬਰ ਉੱਤੇ ਸ਼ਿਕਾਇਤ ਕੀਤੀ ਸੀ, ਜਿਸ ਤਹਿਤ ਵਿਭਾਗ ਦੇ ਉਚ ਅਧਿਕਾਰੀਆਂ ਨੇ ਇਸ ਦੀ ਚੈਕਿੰਗ ਲਈ ਉਨ੍ਹਾਂ ਦੀ ਡਿਊਟੀ ਲਾਈ ਸੀ। ਉਨ੍ਹਾਂ ਦੱਸਿਆ ਕਿ ਇਨਫੋਰਸਮੈਂਟ ਦੀ ਟੀਮ ਨੇ ਡੇਰੇ ਵਿੱਚ ਪੁੱਜ ਕੇ ਜਾਂਚ ਸ਼ੁਰੂ ਕੀਤੀ ਤਾਂ ਪਤਾ ਲੱਗਾ ਕਿ ਇੱਥੇ ਬਿਜਲੀ ਦਾ ਕੋਈ ਮੀਟਰ ਨਹੀਂ ਲੱਗਾ ਤੇ ਪਿਛਲੇ 20-22 ਸਾਲਾਂ ਤੋਂ ਡੇਰੇ ਦੀ ਸਾਰੀ ਸਪਲਾਈ ਬਿਜਲੀ ਦੀ ਕੁੰਡੀ ਲਾ ਕੇ ਚੱਲ ਰਹੀ ਹੈ। ਜਾਂਚ ਦੌਰਾਨ ਮੁੱਢਲੇ ਤੌਰ ਉੱਤੇਪਤਾ ਲੱਗਾ ਕਿ ਡੇਰੇ ਦਾ ਬਿਜਲੀ ਲੋਡ ਲੱਗਭਗ 17 ਕਿੱਲੋਵਾਟ ਹੈ। ਬਿਜਲੀ ਚੋਰੀ ਬਾਰੇ ਜਿੱਥੇ ਵਿਭਾਗ ਨੇ ਡੇਰੇ ਦੇ ਮੌਜੂਦਾ ਮਹੰਤ ਖ਼ਿਲਾਫ਼ ਮੁਕੱਦਮਾ ਦਰਜ ਕੀਤਾ ਹੈ, ਉਥੇ ਡੇਰੇ ਨੂੰ 9 ਲੱਖ ਰੁਪਏ ਤੋਂ ਵਧੇਰੇ ਜੁਰਮਾਨਾ ਵੀ ਕੀਤਾ ਹੈ।