ਲੰਡਨ, 12 ਮਈ (ਪੋਸਟ ਬਿਊਰੋ)- ਰੂਸ ਤੇ ਯੂਕਰੇਨ ਵਿਚਾਲੇ ਚੱਲਦੀ ਜੰਗ ਕਾਰਨ ਕੱਚੇ ਤੇਲ ਦੀ ਕੀਮਤ ਸਿਖਰ ਉੱਤੇ ਪਹੁੰਚ ਗਈ ਹੈ। ਇਸ ਨਾਲ ਕਈ ਦੇਸ਼ਾਂ ਵਿੱਚ ਮਹਿੰਗਾਈ ਨੇ ਕਈ ਦਹਾਕਿਆਂ ਦਾ ਰਿਕਾਰਡ ਤੋੜ ਦਿੱਤਾ ਹੈ।
ਯੂ ਕੇ ਵਿੱਚ ਮਹਿੰਗਾਈ 30 ਸਾਲਾਂ ਦੇ ਅੱਜ ਤਕ ਦੇ ਰਿਕਾਰਡ ਪੱਧਰ ਉੱਤੇ ਪਹੰੁਚ ਗਈ ਹੈ। ਇਸ ਨਾਲ ਲੋਕਾਂ ਨੂੰ ਦੋ ਵਕਤ ਦੀ ਰੋਟੀ ਖਾਣੀ ਔਖੀ ਹੋ ਰਹੀ ਹੈ। ਨਵੀਂ ਖੋਜ ਮੁਤਾਬਕ ਅਗਲੇ ਇੱਕ ਸਾਲ ਵਿੱਚ ਲੱਗਭਗ 15 ਲੱਖ ਪਰਵਾਰ ਖਾਣ-ਪੀਣ ਅਤੇ ਊਰਜਾ (ਬਿਜਲੀ ਤੇ ਗੈਸ) ਦੇ ਬਿੱਲਾਂ ਦਾ ਭੁਗਤਾਨ ਕਰਨ ਦੀ ਸਥਿਤੀ ਵਿੱਚ ਨਹੀਂ ਹੋਣਗੇ। ਮਹਿੰਗਾਈ ਅਤੇ ਭਾਰੀ ਟੈਕਸਾਂ ਨੇ ਉਨ੍ਹਾਂ ਦਾ ਬਜਟ ਵਿਗਾੜ ਦਿੱਤਾ ਹੈ। ਨੈਸ਼ਨਲ ਇੰਸਟੀਚਿਊਟ ਆਫ਼ ਇਕਨਾਮਿਕ ਐਂਡ ਸੋਸ਼ਲ ਰਿਸਰਚ (ਐਨ ਆਈ ਈ ਐਸ ਆਰ) ਦੇ ਅਨੁਸਾਰ ਬ੍ਰਿਟੇਨ ਇਸ ਸਾਲ ਮੰਦੀ ਦੀ ਲਪੇਟ ਵਿੱਚ ਰਹੇਗਾ। ਉਨ੍ਹਾਂ ਨੇ ਵਿੱਤ ਮੰਤਰੀ ਰਿਸ਼ੀ ਸੁਨਾਹ ਨੂੰ ਇਸ ਸਥਿਤੀ ਤੋਂ ਲੋਕਾਂ ਨੂੰ ਬਚਾਉਣ ਲਈ ਹੋਰ ਕਦਮ ਚੁੱਕਣ ਲਈ ਅਪੀਲ ਕੀਤੀ ਹੈ।
ਵਿੱਤ ਮੰਤਰਾਲੇ ਦਾ ਕਹਿਣਾ ਹੈ ਕਿ ਸਰਕਾਰ ਲੋਕਾਂ ਦੀ ਹਰ ਸੰਭਵ ਮਦਦ ਕਰ ਰਹੀ ਹੈ। ਬੈਂਕ ਆਫ਼ ਇੰਗਲੈਂਡ ਦਾ ਕਹਿਣਾ ਹੈ ਕਿ ਮਹਿੰਗਾਈ ਕੁਝ ਮਹੀਨਿਆਂ ਵਿੱਚ 10 ਫ਼ੀਸਦੀ ਤਕ ਜਾ ਸਕਦੀ ਹੈ। ਰਿਪੋਰਟ ਅਨੁਸਾਰ ਸਰਕਾਰ ਨੂੰ ਮਈ ਤੇ ਅਕਤੂਬਰ ਦੇ ਵਿਚਕਾਰ ਹਰ ਹਫ਼ਤੇ ਯੂਨੀਵਰਸਲ ਕ੍ਰੈਡਿਟ ਵਿੱਚ 25 ਪੌਂਡ ਦਾ ਵਾਧਾ ਕਰਨਾ ਚਾਹੀਦਾ ਹੈ। ਇਸ ਨਾਲ ਸਰਕਾਰ ਉੱਤੇ 1.3 ਅਰਬ ਪੌਂਡ ਦਾ ਬੋਝ ਪਵੇਗਾ। ਜੇ ਲੋੜਵੰਦਾਂ ਨੂੰ ਇਹ ਸਹਿਯੋਗ ਨਾ ਦਿੱਤਾ ਤਾਂ ਦੇਸ਼ ਵਿੱਚ ਗਰੀਬੀ ਵਧੇਗੀ। 2022 ਵਿੱਚ ਮਹਿੰਗਾਈ ਦਰ 7.8 ਹੋਵੇਗੀ ਅਤੇ 2024 ਤਕ ਇਹ ਤਿੰਨ ਪ੍ਰਤੀਸ਼ਤ ਤੋਂ ਉਪਰ ਰਹੇਗੀ। ਐਨ ਆਈ ਈ ਐਸ ਆਰ ਦਾ ਕਹਿਣਾ ਹੈ ਕਿ ਸਰਕਾਰੀ ਨੀਤੀਆਂ ਨਾਲ ਦੇਸ਼ ਵਿੱਚ ਲੋਕਾਂ ਦੀ ਅਸਲ ਆਮਦਨ ਘਟੇਗੀ। ਉਨ੍ਹਾਂ ਮੁਤਾਬਕ 2022 ਵਿੱਚ ਪਰਵਾਰਾਂ ਦੀ ਅਸਲ ਆਮਦਨ ਵਿੱਚ 2.4 ਫੀਸਦੀ ਦੀ ਕਮੀ ਆਵੇਗੀ।