ਯਰੂਸ਼ਲਮ, 12 ਮਈ (ਪੋਸਟ ਬਿਊਰੋ)- ਅਲ-ਜਜ਼ੀਰਾ ਦੀ ਜਾਣੀ-ਪਛਾਣੀ ਪੱਤਰਕਾਰ ਸ਼ਿਰੀਨ ਅੱਬੂ ਅਕਲੇਹ ਦੀ ਕੱਲ੍ਹ ਤੜਕੇ ਵੈਸਟ ਬੈਂਕ ਵਿੱਚ ਗੋਲੀ ਲੱਗਣ ਨਾਲ ਮੌਤ ਹੋ ਗਈ ਹੈ।
ਉਤਰੀ ਵੈਸਟ ਬੈਂਕ ਦੇ ਜੇਨਿਨ ਕਸਬੇ ਵਿੱਚ ਇਸਰਾਈਲੀ ਫ਼ੌਜ ਦੀ ਕਾਰਵਾਈ ਦੌਰਾਨ ਹੋਈ ਗੋਲੀਬਾਰੀ ਵਿੱਚ ਸ਼ਿਰੀਨ ਅਬੂ ਅਕਲੇਹ ਦੀ ਮੌਤ ਹੋਈ ਹੈ। ਓਦੋਂ ਉਹ ਰਿਪੋਰਟਿੰਗ ਕਰ ਰਹੀ ਸੀ।ਪ੍ਰਸਾਰਕਸ ਅਲ-ਜਜ਼ੀਰਾ ਨੇ ਆਪਣੀ ਪੱਤਰਕਾਰ ਦੀ ਮੌਤ ਲਈ ਇਸਰਾਈਲੀ ਫੋਰਸਾਂ ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ, ਜਦਕਿ ਇਸਰਾਈਲੀ ਫ਼ੌਜ ਦਾ ਕਹਿਣਾ ਹੈ ਕਿ ਉਹ ਮਾਮਲੇ ਦੀ ਜਾਂਚ ਕਰ ਰਹੀ ਹੈ। ਮਸ਼ਹੂਰ ਫਲਸਤੀਨੀ ਪੱਤਰਕਾਰ ਸ਼ਿਰੀਨ ਅਬ ਅਕਲੋਹ ਅਰਬੀ ਭਾਸ਼ੀ ਚੈਨਲ ਦੀ ਮੰਨੀ-ਪ੍ਰਮੰਨੀ ਰਿਪੋਰਟਰ ਸੀ। ਘਟਨਾ ਦੇ ਇੱਕ ਵੀਡੀਓ ਵਿੱਚ ਅਬੂ ਅਕਲੇਹ ਨੀਲੇ ਰੰਗ ਦੀ ‘ਫਲੈਕ' ਜੈਕੇਟ ਪਹਿਨੇ ਨਜ਼ਰ ਆ ਰਹੀ ਹੈ, ਜਿਸ ਉੱਤੇ ਸਾਫ ਰੂਪ ਨਾਲ ‘ਪ੍ਰੈਸ' ਲਿਖਿਆ ਹੋਇਆ ਹੈ। ਇਸਰਾਈਲ ਦੇ ਰੱਖਿਆ ਮੰਤਰੀ ਨੇ ਅਲ-ਜਜ਼ੀਰਾ ਦੇ ਰਿਪੋਰਟਰ ਦੀ ਹੱਤਿਆ ਦੀ ਡੂੰਘੀ ਜਾਂਚ ਕਰਨ ਦਾ ਵਾਅਦਾ ਕੀਤਾ ਤੇ ਕਿਹਾ ਕਿ ਫਿਲਸਤੀਨੀ ਅਧਿਕਾਰੀ ਉਹ ਗੋਲੀ ਇਸਰਾਈਲ ਨੂੰ ਸੌਂਪ ਦੇਣ, ਜਿਸ ਨਾਲ ਉਸਦੀ ਮੌਤ ਹੋਈ ਹੈ।