ਫ਼ਿਰੋਜ਼ਪੁਰ, 9 ਮਈ (ਪੋਸਟ ਬਿਊਰੋ)- ਏਥੋਂ ਨੇੜਲੇ ਪਿੰਡ ਆਸਲ ਵਿਖੇ ਹੋਏ ਝਗੜੇ ਵਿੱਚ ਜਾਨਲੇਵਾ ਹਮਲਾ ਕਰਨ ਤੇ ਗੋਲੀ ਚਲਾਉਣ ਦੇ ਦੋਸ਼ ਵਿੱਚ ਪੁਲਸ ਨੇ ਅਮਨਦੀਪ ਕੌਰ ਉਰਫ ਮਨੂ ਬਾਬਾ ਪੁੱਤਰੀ ਜਸਵੀਰ ਸਿੰਘ ਪਿੰਡ ਆਸਲ, ਸੁੱਖਾ ਸਿੰਘ ਪੁੱਤਰ ਗੁਰਚਰਨ ਸਿੰਘ, ਅਕਾਸ਼ਦੀਪ ਸਿੰਘ ਪੁੱਤਰ ਬਲਵਿੰਦਰ ਸਿੰਘ ਅਤੇ ਹਰਬੰਸ ਸਿੰਘ ਬਾਬਾ ਪੁੱਤਰ ਕਰਨੈਲ ਸਿੰਘ ਦੇ ਖ਼ਿਲਾਫ਼ ਕੇਸ ਦਰਜ ਕੀਤਾ ਅਤੇ ਅਗਲੀ ਕਾਰਵਾਈ ਕੀਤੀ ਜਾ ਰਹੀ ਹੈ।
ਸ਼ਿਕਾਇਤਕਰਤਾ ਨੇ ਪੁਲਸ ਨੂੰ ਦੱਸਿਆ ਕਿ ਉਹ ਅਤੇ ਹੋਰ ਵਿਅਕਤੀ ਪਿੰਡ ਦੇ ਬਾਬਾ ਖੇਤਰਪਾਲ ਦੀ ਜਗ੍ਹਾ ਕੋਲ ਖੜ੍ਹੇ ਸਨ ਤਾਂ ਅਮਨਦੀਪ ਕੌਰ ਉਰਫ ਮਨੂੰ ਬਾਬਾ ਉਥੇ ਆਈ ਤੇ ਉਨ੍ਹਾਂ ਨੂੰ ਗਾਲੀ-ਗਲੋਚ ਕਰਨ ਲੱਗੀ ਤੇ ਕਹਿਣ ਲੱਗੀ ਕਿ ਬਾਬਾ ਖੇਤਰਪਾਲ ਦੀ ਜਗ੍ਹਾ ਉੱਤੇ ਨਵਾਂ ਸੇਵਾਦਾਰ ਬਿਠਾਉਣ ਦਾ ਪਤਾ ਦੱਸਦੀ ਹਾਂ, ਇੰਨੇ ਵਿੱਚ ਨਾਮਜ਼ਦ ਦੂਸਰੇ ਉਸਦੇ ਸਾਥੀ ਵੀ ਉਥੇ ਆ ਗਏ ਤੇ ਉਸਨਾਲ ਕੁੱਟਮਾਰ ਕਰਨੀ ਸ਼ੁਰੂ ਕਰ ਦਿੱਤੀ।ਸ਼ਿਕਾਇਤਕਰਤਾ ਅਨੁਸਾਰ ਅਕਾਸ਼ਦੀਪ ਨੇ ਉਸਦੇ ਸਿਰ ਉੱਤੇ ਕਾਪੇ ਨਾਲ ਵਾਰ ਕੀਤਾ ਤੇ ਸੁੱਖਾ ਸਿੰਘ ਨੇ ਆਪਣੀ ਪਿਸਤੌਲ ਨਾਲ ਉਸ ਨੂੰ ਮਾਰਨ ਦੀ ਨੀਤ ਨਾਲ ਉਸ ਉੱਤੇ ਫਾਇਰ ਕੀਤੇ, ਜੋ ਉਸ ਕੋਲੋਂ ਲੰਘ ਗਏ ਅਤੇ ਫਿਰ ਇੱਕ ਫਾਇਰ ਕੀਤਾ, ਜੋ ਉਸ ਦੇ ਭਤੀਜੇ ਆਕਾਸ਼ਦੀਪ ਦੇ ਢਿੱਡ ਵਿੱਚ ਲੱਗਾ ਤੇ ਹਰਬੰਸ ਸਿੰਘ ਨੇ ਇੱਟ ਸ਼ਿਕਾਇਤਕਰਤਾ ਦੇ ਮਾਰੀ।ਜ਼ਖ਼ਮੀਆਂ ਵਿੱਚੋਂ ਇੱਕ ਨੂੰ ਫਰੀਦਕੋਟ ਦੇ ਮੈਡੀਕਲ ਕਾਲਜ ਅਤੇ ਦੂਜੇ ਨੂੰ ਪੀ ਜੀ ਆਈ ਵਿੱਚ ਦਾਖਲ ਕਰਵਾਇਆ ਗਿਆ ਹੈ।