ਓਟਵਾ, 8 ਮਈ (ਪੋਸਟ ਬਿਊਰੋ) : ਅਹਿਮ ਐਨਰਜੀ ਸਬੰਧੀ ਕੀਮਤਾਂ ਦੇ ਮਾਹਿਰ ਦਾ ਕਹਿਣਾ ਹੈ ਕਿ ਜੇ ਰੂਸ ਵੱਲੋਂ ਯੂਕਰੇਨ ਖਿਲਾਫ ਜੰਗ ਤੇਜ਼ ਕੀਤੀ ਜਾਂਦੀ ਹੈ ਤਾਂ ਕੈਨੇਡਾ ਭਰ ਵਿੱਚ ਗੈਸ ਦੀਆਂ ਕੀਮਤਾਂ ਪੰਜ ਸੈਂਟ ਹੋਰ ਵੱਧ ਜਾਣਗੀਆਂ।
ਕੈਨੇਡੀਅਨਜ਼ ਫੌਰ ਅਫੋਰਡੇਬਲ ਐਨਰਜੀ ਦੇ ਪ੍ਰੈਜ਼ੀਡੈਂਟ ਡੈਨ ਮੈਕਟੀਗ ਦਾ ਕਹਿਣਾ ਹੈ ਕਿ 9 ਮਈ ਨੂੰ ਰੂਸ ਵਿੱਚ ਵਿਕਟਰੀ ਡੇਅ ਮਨਾਇਆ ਜਾਵੇਗਾ ਤੇ ਯੂਕਰੇਨ ਖਿਲਾਫ ਜੰਗ ਲਈ ਵੀ ਇਹ ਅਹਿਮ ਹੋ ਸਕਦਾ ਹੈ।ਉਨ੍ਹਾਂ ਆਖਿਆ ਕਿ ਜੇ ਯੂਕਰੇਨ ਵਿੱਚ ਸਥਿਤੀ ਵਿਗੜਦੀ ਹੈ ਤਾਂ ਅਗਲੇ ਹਫਤੇ ਗੈਸ ਦੀਆਂ ਕੀਮਤਾਂ ਪ੍ਰਤੀ ਲੀਟਰ ਪੰਜ ਸੈਂਟ ਵੱਧ ਸਕਦੀਆਂ ਹਨ।
ਕੈਨੇਡਾ ਵਿੱਚ ਇਸ ਸਮੇਂ ਗੈਸ ਦੀ ਔਸਤ ਕੀਮਤ 1·97 ਪ੍ਰਤੀ ਲੀਟਰ ਹੈ, ਬ੍ਰਿਟਿਸ਼ ਕੋਲੰਬੀਆ ਵਾਸੀਆਂ ਨੂੰ ਸੱਭ ਤੋਂ ਵੱਧ ਤਕਲੀਫ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਕਿਉਂਕਿ ਉੱਥੇ ਗੈਸ ਦੀ ਔਸਤਨ ਕੀਮਤ 2·06 ਪ੍ਰਤੀ ਲੀਟਰ ਹੈ। ਵੈਨਕੂਵਰ ਵਿੱਚ ਗੈਸ 2·22 ਡਾਲਰ ਪ੍ਰਤੀ ਲੀਟਰ ਹੈ, ਵਿਕਟੋਰੀਆ ਵਿੱਚ 2·17 ਡਾਲਰ ਪ੍ਰਤੀ ਲੀਟਰ, ਮਾਂਟਰੀਅਲ ਵਿੱਚ 2·07 ਪ੍ਰਤੀ ਲੀਟਰ ਤੇ ਸੇਂਟ ਜੌਹਨਜ਼ ਵਿੱਚ 2·03 ਡਾਲਰ ਪ੍ਰਤੀ ਲੀਟਰ ਹੈ।
ਮੈਕਟੀਗ ਨੇ ਅੱਗੇ ਆਖਿਆ ਕਿ ਭਾਵੇਂ ਯੂਕਰੇਨ ਵਿੱਚ ਜੰਗ ਨੇੜ ਭਵਿੱਖ ਵਿੱਚ ਖ਼ਤਮ ਵੀ ਹੋ ਜਾਂਦੀ ਹੈ ਤਾਂ ਵੀ ਗੈਸ ਦੀਆਂ ਵੱਧ ਕੀਮਤਾਂ ਕੁੱਝ ਸਮੇਂ ਲਈ ਹੋਰ ਬਣੀਆਂ ਰਹਿਣਗੀਆਂ। ਉਨ੍ਹਾਂ ਆਖਿਆ ਕਿ ਅਜਿਹਾ ਰੂਸ ਦੇ ਐਨਰਜੀ ਸੈਕਟਰ ਉੱਤੇ ਲਾਈਆਂ ਗਈਆਂ ਪਾਬੰਦੀਆਂ ਕਾਰਨ ਹੋਵੇਗਾ ।
ਉਨ੍ਹਾਂ ਆਖਿਆ ਕਿ ਗਰਮੀਆਂ ਦਾ ਸੀਜ਼ਨ ਵੀ ਗੈਸ ਦੀਆਂ ਕੀਮਤਾਂ ਉੱਚੀਆਂ ਰੱਖਣ ਵਿੱਚ ਅਹਿਮ ਭੂਮਿਕਾ ਨਿਭਾਵੇਗਾ ਕਿਉਂਕਿ ਜਿ਼ਆਦਾ ਲੋਕ ਘੁੰਮਣ ਫਿਰਨ ਤੇ ਟਰੈਵਲ ਲਈ ਸੜਕਾ ਉੱਤੇ ਨਿਕਲਣਗੇ।ਉਨ੍ਹਾਂ ਇਹ ਵੀ ਆਖਿਆ ਕਿ ਕੈਨੇਡੀਅਨ ਡਾਲਰ ਦੀ ਕਮਜ਼ੋਰ ਸਥਿਤੀ ਵੀ ਇਸ ਵਿੱਚ ਅਹਿਮ ਯੋਗਦਾਨ ਪਾਵੇਗੀ।