ਸੰਗਤ ਮੰਡੀ, 17 ਅਪ੍ਰੈਲ (ਪੋਸਟ ਬਿਊਰੋ)- ਸੰਗਤ ਮੰਡੀ ਦੀ ਅਨਾਜ ਮੰਡੀ ਵਿੱਚ ਮਜ਼ਦੂਰਾਂ ਦੇ ਦੋ ਗੁੱਟਾਂ ਵਿੱਚ ਹੋਈ ਲੜਾਈ ਦੌਰਾਨ ਇੱਕ ਮਜ਼ਦੂਰ ਦੀ ਮੌਤ ਹੋ ਗਈ ਹੈ, ਜਦ ਕਿ ਕਈ ਹੋਰ ਜ਼ਖਮੀ ਹੋ ਗਏ।
ਮਿਲੀ ਜਾਣਕਾਰੀ ਅਨੁਸਾਰ ਸਥਾਨਕ ਮੰਡੀ ਦੀ ਮਸ਼ਹੂਰ ਆੜ੍ਹਤੀਆ ਫਰਮ ਜੋਤੀ ਰਾਮ-ਮਦਨ ਲਾਲ ਦੇ ਨਿੱਜੀ ਫੜ੍ਹ ਉੱਤੇ ਕਣਕ ਦੀ ਲੁਹਾਈ, ਝਰਾਈ ਆਦਿ ਦਾ ਕੰਮ ਕਰਦੇ ਮਜ਼ਦੂਰਾਂ ਦੇ ਦੋ ਗੁੱਟ ਕਿਸੇ ਗੱਲ ਲਈ ਆਪਸ ਵਿੱਚ ਲੜ ਪਏ ਤਾਂ ਡਾਂਗਾਂ ਤੇ ਇੱਟਾਂ ਰੋੜੇ ਚੱਲ ਗਏ। ਉਕਤ ਆੜ੍ਹਤੀਆਂ ਦੀ ਦੀਵਾਨ ਸੰਨਜ਼ ਕਾਟਨ ਫੈਕਟਰੀ ਦੇ ਸਾਹਮਣੇ ਦੁਪਹਿਰ ਸਮੇਂ ਉਨ੍ਹਾਂ ਦੇ ਨਿੱਜੀ ਫੜ੍ਹ ਉੱਤੇ ਵਾਪਰੀ ਲੜਾਈ ਦੀ ਇਹ ਘਟਨਾ ਕਣਕ ਦੀ ਟਰਾਲੀ ਉਤਾਰਨ ਦੇ ਮਾਮੂਲੀ ਝਗੜੇ ਤੋਂ ਸ਼ੁਰੂ ਹੋਈ ਦੱਸੀ ਜਾਂਦੀ ਹੈ, ਜੋ ਬਾਅਦ ਵਿੱਚ ਗਾਲੀ ਗਲੋਚ ਅਤੇ ਡਾਂਗਾਂ ਸੋਟਿਆਂ ਸਮੇਤ ਇੱਟਾਂ ਰੋੜੇ ਚੱਲਣ ਕਾਰਨ ਖੂਨੀ ਲੜਾਈ ਤੱਕ ਚਲੀ ਗਈ, ਜਿਸ ਵਿੱਚ ਪਿੰਡ ਸੰਗਤ ਕਲਾਂ ਦੇ ਸਾਬਕਾ ਪੰਚਾਇਤ ਮੈਂਬਰ ਗੁਰਚਰਨ ਸਿੰਘ ਦੇ ਨੌਜਵਾਨ ਪੁੱਤਰ ਗੁਰਦੀਪ ਸਿੰਘ ਉਰਫ ਦੀਪਾ (32) ਦੇ ਸਿਰ ਵਿੱਚ ਗੰਭੀਰ ਸੱਟਾਂ ਲੱਗੀਆਂ। ਉਸ ਨੂੰ ਬਠਿੰਡਾ ਦੇ ਸਰਕਾਰੀ ਹਸਪਤਾਲ ਲਿਜਾਇਆ ਗਿਆ ਤਾਂ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਲੜਾਈ ਦੌਰਾਨ ਕੁਝ ਹੋਰ ਵਿਅਕਤੀ ਵੀ ਜ਼ਖਮੀ ਹੋਏ ਦੱਸੇ ਗਏ ਹਨ, ਜੋ ਸਰਕਾਰੀ ਹਸਪਤਾਲ ਬਠਿੰਡਾ ਵਿਖੇ ਦਾਖਲ ਹਨ।