ਓਨਟਾਰੀਓ, 13 ਜਨਵਰੀ (ਪੋਸਟ ਬਿਊਰੋ) : ਟੋਰਾਂਟੋ ਡਿਸਟ੍ਰਿਕਟ ਸਕੂਲ ਬੋਰਡ ( ਟੀਡੀਐਸਬੀ ) ਵੱਲੋਂ ਸੋਮਵਾਰ ਨੂੰ ਸਕੂਲ ਖੁੱਲ੍ਹਣ ਤੋਂ ਪਹਿਲਾਂ ਆਪਣੀਆਂ ਬੈਕ ਟੂ ਸਕੂਲ ਗਾਈਡਲਾਈਨਜ਼ ਨੂੰ ਅਪਡੇਟ ਕੀਤਾ ਗਿਆ ਹੈ।ਇਨ੍ਹਾਂ ਵਿੱਚ ਇਹ ਆਖਿਆ ਗਿਆ ਹੈ ਕਿ ਸੇਫਟੀ ਮਾਪਦੰਡਾਂ ਵਿੱਚ ਵਾਧਾ ਕਰਨ ਲਈ ਵਾਧੂ ਹੈਪਾ ਫਿਲਟਰਜ਼ ਮੁਹੱਈਆ ਕਰਵਾਏ ਜਾਣਗੇ।
ਸਿੱਖਿਆ ਮੰਤਰੀ ਸਟੀਫਨ ਲਿਚੇ ਨੇ ਬੁੱਧਵਾਰ ਨੂੰ ਕੀਤੀ ਨਿਊਜ਼ ਕਾਨਫਰੰਸ ਵਿੱਚ ਆਖਿਆ ਕਿ ਓਨਟਾਰੀਓ ਦੇ ਰਿਟਰਨ ਟੂ ਇਨ ਪਰਸਨ ਲਰਨਿੰਗ ਪਲੈਨ ਤਹਿਤ ਸਾਰਾ ਧਿਆਨ ਰੈਪਿਡ ਟੈਸਟਿੰਗ, ਸੋਧੀ ਹੋਈ ਵੈਂਟੀਲੇਸ਼ਨ ਤੇ ਵੈਕਸੀਨੇਸ਼ਨ ਤੱਕ ਪਹੁੰਚ ਤੋਂ ਇਲਾਵਾ ਪੀਪੀਈ ਕਿੱਟਜ਼ ਉੱਤੇ ਕੇਂਦਰਿਤ ਕੀਤਾ ਗਿਆ ਹੈ।
ਓਨਟਾਰੀਓ ਦੇ ਸਕੂਲਾਂ ਦੇ ਪ੍ਰਿੰਸੀਪਲਜ਼ ਨੂੰ ਕੋਵਿਡ-19 ਆਊਟਬ੍ਰੇਕਸ ਪਬਲਿਕ ਹੈਲਥ ਯੂਨਿਟਸ ਨੂੰ ਉਸ ਸਮੇਂ ਰਿਪੋਰਟ ਕਰਨੀਆਂ ਹੋਣਗੀਆਂ ਜਦੋਂ ਵਿਦਿਆਰਥੀਆਂ ਤੇ ਸਟਾਫ ਵਿੱਚ ਗੈਰਹਾਜ਼ਰੀ ਦਰ 30 ਫੀ ਸਦੀ ਤੱਕ ਹੋਵੇਗੀ।ਇਸ ਹੱਦ ਤੱਕ ਸਥਿਤੀ ਪਹੁੰਚਣ ਤੋਂ ਪਹਿਲਾਂ ਹੀ ਮਾਪਿਆਂ ਕੋਲ ਸਕੂਲ ਆਊਟਬ੍ਰੇਕਸ ਸਬੰਧੀ ਡਾਟਾ ਤੱਕ ਪਹੁੰਚ ਹੋਵੇਗੀ। ਟੀਡੀਐਸਬੀ ਨੇ ਆਖਿਆ ਕਿ ਨਤੀਜੇ ਵਜੋਂ ਪੀਸੀਆਰ ਜਾਂ ਰੈਟ ਟੈਸਟ ਵਿੱਚ ਮਾਮਲਿਆਂ ਦੀ ਪੁਸ਼ਟੀ ਹੋਣ ਤੋਂ ਬਾਅਦ ਸਕੂਲਾਂ ਨੂੰ ਜਾਣੂ ਕਰਵਾਏ ਜਾਣ ਮਗਰੋਂ ਪ੍ਰਭਾਵਿਤ ਕਲਾਸਾਂ ਨੂੰ ਇਸ ਬਾਰੇ ਜਾਣਕਾਰੀ ਦਿੱਤੀ ਜਾਵੇਗੀ।
ਵੀਰਵਾਰ ਨੂੰ ਡਾਇਰੈਕਟਰ ਆਫ ਐਜੂਕੇਸ਼ਨ ਕੌਲੀਨ ਰਸਲ ਰਾਅਲਿੰਨਜ਼ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਪਹਿਲਾਂ ਜਿਵੇਂ ਸਿੱਖਿਆ ਮੰਤਰਾਲੇ ਵੱਲੋਂ ਇਹ ਆਖਿਆ ਗਿਆ ਸੀ ਕਿ ਕੋਵਿਡ-19 ਕੇਸ ਆਉਣ ਤੋਂ ਬਾਅਦ ਕਲਾਸਾਂ ਡਿਸਮਿਸ ਨਹੀਂ ਕੀਤੀਆਂ ਜਾਣਗੀਆਂ, ਹੁਣ ਅਜਿਹਾ ਨਹੀਂ ਹੋਵੇਗਾ। ਇਸ ਦੀ ਥਾਂ ਉੱਤੇ ਮਾਪੇ/ਗਾਰਡੀਅਨਜ਼ ਤੇ ਵਿਦਿਆਰਥੀ ਰੋਜ਼ਾਨਾਂ ਕੋਵਿਡ-19 ਸਕਰੀਨਿੰਗ ਟੂਲ ਦਾ ਮੁਲਾਂਕਣ ਕਰਕੇ ਇਹ ਪਤਾ ਲਾ ਸਕਣਗੇ ਕਿ ਕੀ ਉਨ੍ਹਾਂ ਨੂੰ ਸਕੂਲ ਪਰਤਣ ਦੀ ਇਜਾਜ਼ਤ ਹੈ।