ਓਨਟਾਰੀਓ, 13 ਜਨਵਰੀ (ਪੋਸਟ ਬਿਊਰੋ) : ਬੁੱਧਵਾਰ ਰਾਤ ਨੂੰ ਵਸਾਗਾ ਬੀਚ ਉੱਤੇ ਸਥਿਤ ਘਰ ਤੋਂ ਇੱਕ ਮਹਿਲਾ ਨੂੰ ਅਗਵਾ ਕਰ ਲਿਆ ਗਿਆ। ਮਹਿਲਾ ਦੀ ਸੇਫਟੀ ਨੂੰ ਲੈ ਕੇ ਓਪੀਪੀ ਚਿੰਤਤ ਹੈ।
ਟਰੇਲਵੁੱਡ ਪਲੇਸ ਉੱਤੇ ਸਥਿਤ ਇੱਕ ਘਰ ਵਿੱਚ ਕੁੱਝ ਮਸ਼ਕੂਕਾਂ ਦੇ ਦਾਖਲ ਹੋ ਜਾਣ ਦੀ ਰਿਪੋਰਟ ਦੇ ਕੇ ਰਾਤੀਂ 8:32 ਉੱਤੇ ਪੁਲਿਸ ਨੂੰ ਸੱਦਿਆ ਗਿਆ।ਜਿੰਨੇ ਚਿਰ ਨੂੰ ਪੁਲਿਸ ਅਧਿਕਾਰੀ ਦੱਸੇ ਗਏ ਘਰ ਵਿੱਚ ਪਹੁੰਚੇ ਓਨੇ ਚਿਰ ਨੂੰ ਮਸ਼ਕੂਕ ਮਹਿਲਾ ਨੂੰ ਅਗਵਾ ਕਰਕੇ ਲਿਜਾ ਚੁੱਕੇ ਸਨ। ਮਹਿਲਾ ਦੀ ਪਛਾਣ 37 ਸਾਲਾਂ ਦੀ ਐਲਨਾਜ਼ ਹਜਤਾਮਿਰੀ ਵਜੋਂ ਕੀਤੀ ਗਈ ਹੈ। ਅਗਵਾ ਕੀਤੀ ਗਈ ਮਹਿਲਾ ਨੂੰ ਤਾਮਿਰੀ ਸਰਨੇਮ ਨਾਲ ਵੀ ਜਾਣਿਆ ਜਾਂਦਾ ਹੈ।
ਹਜਤਾਮਿਰੀ ਦਾ ਕੱਦ ਪੰਜ ਫੁੱਟ ਤਿੰਨ ਇੰਚ ਦੱਸਿਆ ਗਿਆ ਹੈ, ਉਹ ਪਤਲੀ ਹੈ ਤੇ ਉਸ ਦੇ ਮੋਢਿਆਂ ਤੱਕ ਕੱਟੇ ਕਾਲੇ ਵਾਲ ਹਨ। ਪੁਲਿਸ ਤਿੰਨ ਮਸ਼ਕੂਕਾਂ ਦੀ ਭਾਲ ਕਰ ਰਹੀ ਹੈ ਜਿਹੜੇ ਚਿੱਟੇ ਰੰਗ ਦੀ ਐਸਯੂਵੀ ਵਿੱਚ ਫਰਾਰ ਹੋਏ ਹਨ।