ਬੀਜਿੰਗ, 11 ਜਨਵਰੀ ( ਪੋਸਟ ਬਿਊਰੋ) : ਕੋਵਿਡ-19 ਆਊਟਬ੍ਰੇਕ ਕਾਰਨ ਚੀਨ ਵੱਲੋਂ ਆਪਣੇ ਤੀਜੇ ਸ਼ਹਿਰ ਵਿੱਚ ਵੀ ਲਾਕਡਾਊਨ ਲਾ ਦਿੱਤਾ ਗਿਆ ਹੈ। ਇਸ ਨਾਲ ਚੀਨ ਵਿੱਚ 20 ਮਿਲੀਅਨ ਦੇ ਨੇੜੇ ਤੇੜੇ ਲੋਕ ਆਪਣੇ ਘਰਾਂ ਤੱਕ ਹੀ ਸੀਮਤ ਹੋ ਕੇ ਰਹਿ ਗਏ ਹਨ।
ਅਨਿਆਂਗ ਵਿੱਚ ਲਾਕਡਾਊਨ ਸੋਮਵਾਰ ਨੂੰ ਉਸ ਸਮੇਂ ਐਲਾਨਿਆ ਗਿਆ ਜਦੋਂ ਓਮਾਈਕ੍ਰੌਨ ਦੇ ਦੋ ਮਾਮਲੇ ਦਰਜ ਕੀਤੇ ਗਏ। ਇੱਥੇ 5·5 ਮਿਲੀਅਨ ਲੋਕ ਰਹਿੰਦੇ ਸਨ। ਲਾਕਡਾਊਨ ਤੋਂ ਬਾਅਦ ਹੁਣ ਸਥਾਨਕ ਵਾਸੀਆਂ ਨੂੰ ਬਾਹਰ ਜਾਣ ਦੀ ਇਜਾਜ਼ਤ ਨਹੀਂ ਹੈ ਤੇ ਜ਼ਰੂਰੀ ਸਮਾਨ ਵੇਚਣ ਵਾਲੇ ਸਟੋਰਜ਼ ਤੋਂ ਇਲਾਵਾ ਸਾਰੇ ਸਟੋਰਜ਼ ਨੂੰ ਬੰਦ ਕਰ ਦਿੱਤਾ ਗਿਆ ਹੈ।
ਹਰ 13 ਮਿਲੀਅਨ ਲੋਕ ਤਿੰਨ ਹਫਤਿਆਂ ਤੋਂ ਜਿ਼ਆਨ ਸਿਟੀ ਵਿੱਚ ਲਾਕਡਾਊਨ ਕਾਰਨ ਬੰਦ ਹਨ ਤੇ 1·1 ਮਿਲੀਅਨ ਤੋਂ ਵੱਧ ਲੋਕ ਇੱਕ ਹਫਤੇ ਤੋਂ ਵੀ ਵੱਧ ਸਮੇਂ ਤੋਂ ਯੂਜੋ਼ਊ ਵਿੱਚ ਲਾਕਡਾਊਨ ਵਿੱਚ ਰਹਿਣ ਲਈ ਮਜਬੂਰ ਹਨ। ਅਜੇ ਤੱਕ ਇਹ ਸਪਸ਼ਟ ਨਹੀਂ ਹੋ ਸਕਿਆ ਹੈ ਕਿ ਅਨਿਆਂਗ ਦਾ ਲਾਕਡਾਊਨ ਕਿੰਨਾਂ ਚਿਰ ਚੱਲੇਗਾ।ਮਹਾਂਮਾਰੀ ਦੀ ਸ਼ੁਰੂਆਤ ਸਮੇਂ 2020 ਦੀ ਸ਼ੁਰੂਆਤ ਵਿੱਚ ਵੁਹਾਨ ਤੇ ਹੁਬੇਈ ਪ੍ਰੋਵਿੰਸ ਵਿੱਚ ਕੀਤੇ ਗਏ ਲਾਕਡਾਊਨ ਤੋਂ ਵੀ ਇਹ ਲਾਕਡਾਊਨ ਲੰਮੇਂ ਸਮੇਂ ਲਈ ਲਾਏ ਗਏ ਹਨ।
ਇਸ ਨਾਲ 4 ਫਰਵਰੀ ਤੋਂ ਬੀਜਿੰਗ ਵਿੱਚ ਹੋਣ ਜਾ ਰਹੀਆਂ ਸਰਦ ਰੁੱਤ ਦੀਆਂ ਓਲੰਪਿਕਸ ਖੇਡਾਂ ਉੱਤੇ ਵੀ ਓਮਾਈਕ੍ਰੌਨ ਦਾ ਪਰਛਾਵਾਂ ਪੈਂਦਾ ਨਜ਼ਰ ਆ ਰਿਹਾ ਹੈ। ਇਸੇ ਲਈ ਚੀਨ ਵੱਲੋਂ ਲਾਕਡਾਊਨ ਦਾ ਸਿਲਸਿਲਾ ਤੇਜ਼ ਕੀਤਾ ਗਿਆ ਹੈ।